KHAWTHLIR

Flag march
Lok Sabha inthlanpui awm turah inthlanna felfai, thianghlim, muanawm leh rálmuang tak a awm theih nan venhimna lama thawktute'n hma an la reng a ni tih mipuiin an hriat theihna atan April 8, Thawhṭanni khan Lawngtlai district police-te leh BSF sipaite'n Lawngtlaiah flag march an nei. Flag march-ah hi Lawngtlai SP Amit Goel-in hoin inthlannaa duty tura lo kal sipaite hian Lawngtlai-III-a Central YLA Hall aṭangin Govt Lawngtlai College thleng kawng an zawh a ni.

Inhrilhhriatna
April 8, Thawhṭanni khan MYA Multipurpose Hall, Siahaah Lok Sabha inthlan awm tura venhimna lam thawktute thil pawimawh hrang hrang hrilhfiah an ni. Inkhawmah hian Siaha SP Vikram Singh leh police hotu dangte'n venhimna lama thawktute hriat tur pawimawh hrang hrang - inthlan huna venhimna kalpui dan tur te, an duty laia tihtur leh tih lohtur thil te, an duty-na hmun tur leh duty-na hmun pan dan turte an hrilhfiah. Security personnel te pawhin an hotute hnenah an thil hriatduh leh an hriatchian lo laite zawtfiah.

Wales ram pan
Synod moderator Rev. R Lalhmingthanga chuan Presbyterian Church of Wales a tlawh dawn a, amah zuitu Mizoram Synod Choir-te nen nimin khan Aizawl chhuahsanin Wales an pan. Mizoram Synod Choir-te hi Wales-a International Choral Festival-ah an tel nghal dawn a ni.

CM relief fund
Chief Minister Relief Fund-ah Tun hnai khan Mizo National Youth Front, Serchhip block-in Rs. 5,000 an chhûng lut a, Roluahpuia, Serchhip-in Rs. 1,000 a chhung lut bawk.

Budget pass
Mizoram Cooperative Apex Bank chuan nimin khan an head office-ah Board of Directors meeting an nei a, kum 2019-20 chhunga budget, credit plan leh target an pass. An bank-a thawk mi panga service tihngheh leh Selection Commission meeting rawtna anga officer hrang hrang 11 kaisantirte an pawm a, MCAB branch hrang hranga empanelled lawyer chhawr turte leh bank audit hna thawktu tur chartered accountant firm an ruat nghal bawk.