Sorkarin inthlan ní-a hriat tur a tichhuak
Sorkar thuchhuah chuan, inthlan vote thlâk ni, April 11, Ningania mi tinin an zawm tur dan Election Commission of India (ECI)-in a siam pawimawh zualte a tarlang. Chief electoral officer (CEO) Ashish Kundra chuan district election officer (DEO) tin hnenah lehkha thawnin, a ṭul anga bawhzui turin a hriattir a; inthlan vote thlakna polling station chhunga media person-te an luh phal a nih thu a tarlang.
Vote thlak ni-a hriat tur pawimawhte
1. Candidate, candidate agent leh party worker ten DEO-in phalna a pek sa lirthei pakhat ṭheuh bak an hmang thiang lo.
2. Lirtheiah driver telin mi panga aia tam chuan phal a ni lo.
3. Motor hma lam darthlalang (windshield)-ah DEO-in phalna a pek (permit) tarlan tur a ni.
4. Motor-ah voter-te phurh phal a ni lo, dan zâwm lote chu The Representation of People Act, 1951 Section 133 (corrupt practice) leh IPC Section 123(A) hmangin hrem theih an ni.
5. Candidate leh agent-te'n voter-te vote thlak tura a thlawna polling station an panna leh an hawna tur lirthei an ngaihtuahsak tur a ni lo.
6. Polling station aṭanga metre 100 chhungah voter-te thlêm leh biak tlawn phal a ni lo a, campaign banner leh poster târ phal a ni lo.
7. Polling station aṭanga metre 100 chhungah aurinna hmanrua reng reng hman khap a ni.
8. Candidate-te'n election booth an siam duh a nih chuan, polling station aṭanga metre 200-a hláah an siam tur a ni a, dawhkân pakhat leh chair pahnih bâk dah phal a ni lo. Páwn lam aṭanga hmuh theih tur a ni a, a sír bang zàr/siam loh tur a ni. Banner pakhat ft. 3x1.5 târ phal a ni a, booth viltute'n voter ID an kawl ngei tur a ni. Inthlan kaihhnawih thil lehkha them emaw thil dang eng pawh an sem chhuak tur a ni lo. Thuneitute (local authority) hnen aṭangin booth siam phalna an la ngei tur a ni.
9. Sipai duty leh phalna neite tih loh chuan polling station aṭanga metre 100 chinah silai an keng tur a ni lo a, polling booth-ah VIP leh official pawimawhte vengtu sipai, PSO, etc. ah an luh phal a ni lo.
10. Polling booth-a vote thlaktute'n EVM an hmet lai thla, tu nge an vote tih tarlang thei lak phal a ni lo.