Aizawlah two wheeler rally huaihawt

Congress party leh ZPM ṭha­laite chuan nimin chawhma dar 9:30 khan Lok Sabha inthlan leh MLA bye-election awm tur campaign khârna atan Aizawlah two wheeler rally an huaihawt.

Kawngzawha tel turte chu Ngaizelah an innghâk khawm a, Ngaizel aṭangin Aizawl khawpui lûn lai kawngpui dung hrûtin kawng an zawh a, Vanapa Hall kawtah an tâwp a ni.

Ngaizela inkhawm tâwi buatsaihah MPYCC president Dr Lalmalsawma Nghaka chuan, Mizoram leh hnam leh Kristian sakhua humhim duhtu ṭhalai tam tak an la awm chu thlamuanthlak a tih thu sawiin, "Lok Sabha MP kan thlan turah mipui aiawh ṭhalai viak ṭha, Zo fate tana mi thawh hlâwk leh chhenfâkawm ni thei tur Pu Lalnghinglova Hmar kan nei hi a vanneihthlak hle. Hnam hnatlang anga ngai a, kan ram, hnam leh sakhua a him theih nan Pu Tetea vote vek turin Zoram mipui kan ngen tak meuh a ni," a ti.

Dr Lalmalsawma chuan, Aizawl West-I Assembly bye-election neih turah pawh MPCC-ZPM ten candidate atana an vawrh chhuah Lalbuanga Sailo chu mi hmingṭha, hawizau leh bial leh ram tana tih tak zeta thawk thei tur a nih thu sawiin, Lalbuanga Sailo chu vote ṭheuh turin Aizawl West-I bial mipui a ngen a ni.

ZPM ṭhalai president Malsawmzuala chuan, rally nei tur hian Election Commission of India (ECI) phalna an neih thu leh, mipui nunphung pangngai leh lirthei veivâk dang tibuai lo zawnga rally nei an nih thu a sawi.