State Day of Prayer nei turin BCM-in sorkara thlen an rél

Lunglei Rahsi Veng BCM Kohhran biak-ina nghah Mizoram Baptist Kohhran rorelna sang ber, BCM Assembly vawi 124-na chu nizan khan a ṭiak. BCM hian State Day of Prayer neih a nih theih nan Mizoram sorkara thlen an rél.

March 4, 2020-a ṭan BCM Assembly-ah hian president Rev. Dr K Lalrinthanga kaihhruaiin rorel a ni a, palai 1,100 chuang an tel. 'State Day of Prayer' kum tina nei turin Mizoram sorkarah thlen ni rawh se,' an ti. BCM Assembly hian pro. pastor paruk pastor atana nemngheh turin a pawm a, pro. pastor atan mi panga lak a remti. Kum 2021-a Assembly thleng turin BCM Lunglei Ramthar Kohhran leh kum 2022-a Assembly neih nan BCM Gilgal Kohhran, Theiriat an thlang.

Pastor bial thar pathum - Chawngte-L Bial, Mampui Bial leh N. Vanlaiphai Bialte siam an remti a; Republic  Bial chu Aizawl Central Bial tih leh, Thorang Bial chu Thénhlûm Bial tia thlak an remti bawk. An rorel zingah - cancer chungchanga hmalakna turin Cancer Mission din te, ruihhlo hluar zel a tlem theih nan Preventive & Care chak zawka kalpui te, Administrative Officer post thar siamte a tel a; administrative officer atan Lalruatkima thlan a ni.

Nimin khan chawhma inkhawmah BCM President-in pastor atan mi paruk a nemnghet a, pro. pastor turin mi panga a dahnghet bawk. Chawhnu inkhawmah Lalpa Zanriah Sakramen ṭheh a ni.

Mizoram Baptist Kohhranah hian statistics thar ber (2019-2020)-ah pastor bial 85-ah tualchhung kohhran 663 a awm a, chhungkua 36,338-ah member 1,69,854 an awm. Minister/pastor thawk lai 148 leh pension tawh la dam 39 an awm a, kohhran upa 3,304 an awm bawk.