KHAWTHLIR

May 30, Inrinni khan Independent Church of India (ICI) ṭhalaite chuan an silver jubilee lawm nan Aizawl Civil Hospital blood bank-ah thisen unit 23 an pe a, petute mipa 20 leh hmeichhia pathum an ni. ṬKP Chawnhu, Lawng­tlai unit pawhin Lawng­tlai District Hospital-ah thisen unit 19 an pe a, petute mipa 15 leh hmeichhia pali an ni.

Community Health Action Network (CHAN) leh ZPM party consultant F Rodingliana hma­laknain May 30, Inrinni khan Maubuangah leiṭha leh thlai chi eng emaw zat sem a ni.

Ronald Abhijit Babu (17) s/o Victoria Chowdhury, Chaltlang Lily Veng chu May 29, Zirtawpni tlai dar 4 vel khan an in bul step-ah chesualin, khâmah metre 200 vel a lum a, a hmun­ah a thi. Ronald Abhijit Babu ruang hi Inrinni zan dar 7:45-ah lak chhuah a ni.

Lawngtlai khawpui châwmtu PHE feeding main pipe line chu LIKBK Hermon Kohhran biak-in bulah Inrinni khan leiminin a hnâwl chhia a, ni thum chhunga siamṭhat theih beisei a ni. Thu dawn danin, pipe chhia hian Lawngtlaia tui connetion nei chhungkua 2,650 a châwm a; PHE department hotute chuan, pipe line thar kalna atan LIKBK Hermon Kohhran­in an ram lak hêk an phal chu lawm­awm an tih thu an sawi.

Minister of state TJ Lalnuntluanga chuan May 29-30 chhung khan Tipa RD block hnuaia Myanmar ramri dep khuaa task force duty-te a tlawh. A department chana hmasawnna hnathawh mek Siahatla Venga District Court building, judicial quarter (grade-I) leh DTO office building sak mek a tlawh nghal bawk.

Mizoram Youth Commission chairman Dr Vanlalṭanpuia, MLA chuan May 29 khan a bial Lunglei North chhunga khaw ṭhenkhata quarantine centre-te a tlawh a; medical team, task force leh thawktu dangte kâwmin, an hnathawh dan leh harsatnate a sawipui. Dr Vanlalṭanpuia chuan official-te chu uluk tak leh fimkhur taka duty turin a chah a ni.