KHAWTHLIR

Inrinni khan DAY-NULM, One Stop Centre leh Mahila Shakti Kendra ṭangkawp chuan Lawngtlai DC conference hall-ah International Women’s Day 2020 an hmang a, SDO (Sadar) V Lalruatliana'n a hman pui. Day lawmnaah hian LWA General Headquarters hruaitute, LWA branch tin aṭangin member pahnih ṭheuh, MHIP Sub-Headquarters hruaitute leh branch tin aṭangin member pahnih ṭheuh, Lawngtlai khawpui chhunga anganwadi worker leh helper-te bakah DAY-NULM hnuaia ALF member-te an tel a ni. 

Excise & Narcotics department chuan March 1-7, 2020 chhung khan rakzu litres 2205.80, zu bilhlai ṭin 1580, zu siamna bel 42, sap zu (ml. 750) bottles 40, sapzu (ml. 375) bottles 40, BEDC litres 24.8, heroin grams 75.465, ganja gms. 32.65, methamphatamine kgs. 1.980, cough syrup pials 25, alprozolam tablets 40 leh ruihhlo kaihhnawihah mi 79 an man.

Lunglei South bialtu MLA Dr K Pachhunga chuan Inrinni khan bial chhunga sorkar hriatpuiloha Chawngte Forest Reserve huam chhunga Chakma-te’n khua an din Ngiautlang khua aṭanga Chakmate sawn chhuahna tur Chawngte khaw daia Gulsil khua tlawhin, a ṭul anga hma lak a nih theih nan khawtlang hruaitute leh he hmuna chengte a kawm. Dr K Pachhunga chuan, sorkar chuan a enkawl mipuite ṭhatna aduh avangin khua leh tui ṭha chuan sorkar hmalakna leh ruahmannate anzah thiam ṭhin thu a sawi.

Pradhan Mantri Awaas Yojona Gramin (PMAY-G) hnuaia Siaha district chhunga in sak ṭanpuina kalpui mekah kum 2016-2017 chhunga 2nd phase ṭanpuina dawngtu mi 587 te chu a hmunah tlawhin DRDA a thawkten an hnathawh dan an enfiah. Siaha district-ah hian kum 2011 chhiarpui aṭanga auto priority list generated chhungkua 1984 awmin, PMAY-G hnuaia insak ṭanpuina hmu hi chhungkua 811 an awm tawh a ni.