Aizawlah ráltlân mi 300 vel an awm Raltlan tan sorkarin ṭanpuina a la pe lo?

Myanmar ram buaina avangin sahimna zawnga Mizorama lut tawh zat chiah hriat theih ni lo mah se, mi sang khat an chuang tawha hriat a ni a, chu'ng zinga mi 300 vel chu Aizawlah an awm tawh. Ráltlânte tan Mizoram sorkar aṭangin a taka sum pek chhuah a la awm loa thu dawn a ni. Hetih lai hian, ráltlân zinga Mizorama lut hmasa ber chu an ramah thawn lêt a ni.

Thu dawn danin, Myanmar aṭanga ráltlàn Mizorama lutte zinga eng emaw zat chu Myanmar ram hnaih khaw hrang hrangah an awm mek. Aizawla awm tawh mi 300 vel zinga mi 100 vel chu pan tur bik chhungte nei lo an ni.

Myanmar aṭanga Mizorama ráltlân chungchangah CM Zoramthanga chuan kumin March 5-a Vanapa Hall-a Chapchar Kût hmannaah, "... mangang takin mi eng emaw zat Mizoram lamah an lo tlanchhia a. Ei tur lamah harsatna an neih tâkin tiin sorkar pawhin pawisa kan sanction a, a ṭul ang zelin kan pe dawn a ni," a ti a; anmahni hmuna an kìr leh hma chu an ei turte ngaihtuahsak turin sorkarin sum a pek thu a sawi a ni.

Sorkar thuchhuah (IPR press release) pawhin, 'Chief Minister chuan Myanmar-a kan unaute pawhin tunah sipai rorelna avangin harsatna an tawh avanga pawi a tih thu sawiin, ei tura harsatna tâwkte tan sawrkar pawhin sum a sanction thute a sawi a ni,' tiin a tarlang.

Myanmar ráltlânte tana Mizoram sorkarin sum a pek chhuah tawh dan Vanglaini palaiin a zawhna chu Finance Secretary chuan fimkhur a ngaih avang leh sorkar laipui vènthâwn a ngaih avangin a sawi theih loh thuin a chháng. Hetih lai hian, Mizoram sorkarin sum a la pe chhuak lo nia thu dawn a ni bawk.

Hetih lai hian, Myanmar aṭanga sahimna zawnga Zokhawthar kaltlanga Mizorama lut hmasa ber mipa pakhat, Myanmar police chu sorkara thuneitute hriattir an nih hnuah kumin February thla chawhma lam khan an ramah thawn lêt a ni.

Thu dawn danin, ráltlân thawn lêt tâk chu Zokhawtharah ramri kânin Mizoramah a lut a, a luh zan hian hmun remchang laiah riakin, a tûkah Zokhawthar khawtlang hruaitute hnenah a inhriattir a ni. Ráltlân Mizorama lut an awm chuan sorkarah hriattir tura tih an nih avangin Zokhawthar khawtlang hruaitute hian Champhai DC-ah an hriattir a, a hnu lawkah Zokhawthar-a awm Assam Rifles-te'n hma lain, Myanmar-ah an thawn kîr a ni.

Aizawla awm ráltlânte chu United for Democratic Myanmar (UDM) hruaitute'n an buaipui a; UDM chairman Lalramlawma chuan, Home minister Lalchámliana an hmuh hnuah ráltlânte an awm khawmna tur sorkarin a ngaihtuahsak an beisei thu a sawi.

UDM Chairman chuan, ráltlânte buaipui chu a tìr lamah chuan a hautak thu a sawi rualin, tunah chuan an thla a muan ṭan thu a sawi a, "Mi ṭhahnemngaite aṭangin pawisa kan dawng a, kan thawh bawk a, ráltlânte hi kan hnen an lo thlen a, an chhuah leh dawnah Rs. 2,000 zel kan pe a ni. A tir lamah chuan hautak mah se, tunah chuan min ngaihsaktu an tam ta a, kan thla a muang ve ta," a ti.

Ráltlânte awmna tur chu a buaithlak leh harsa ber a nih thu sawiin Lalramlawma chuan, "Home Minister kan bia a, thu lawmawm deuhte kan hria. Veng mawng lam, berh ve tak tak ina dahte chu rilru a nuam lo khawp mai," a ti a; anmahni enkawl nan vehbúr an khawn thu leh mimal leh páwl anga ṭanpuina - sum, buhfai, dailuah, thawmhnaw leh thil dangte pe eng emaw zat an awm tawh thu a sawi.

Lalramlawma chuan, ráltlân zinga chhungte pan tur nei chuan an pan leh ṭhin thu sawiin, "A ṭhen chu inhlawhna mamawhte an ni a, hnathawh tur neite'n min rawn hrilh bawk. Mi hausa deuh huanahte an inhlawh a, an riak nghal ṭhin," a ti.

UDM hruaitute chuan March 30, Thawhlehni khan Aizawla awm ráltlânte chu an awmnaah an tlawh chhuak a, Human Rights and Law Network (HRLN) hruaitute leh Health deptt. aiawhte an tel. Health department mite chuan ráltlânte hriselna dinhmun an endik a ni.

Myanmar ráltlân chungchangah hian sorkar thuneitu lamte'n thil awm dan dik tak an sawi chiang duh lo a, hei vang hian raltlan zat dik tak leh an chungchang thil dangte hriat chian theih a ni lo.