Lungleiah bawlhhlawh thliar ṭan dawn

Vawiin aṭangin Lunglei khawpuiah bawlhhlawh thliar hran kalpui tur a ni a; hemi chungchangah hian nimin khan Lunglei High Powered Committee (HPC) vice chairman Lawmawma Tochhawng, MLA chuan a pisaah thuthar thehdarhtute a kâwm.

HPC Vice Chairman chuan, hmasawnna kal zelah Lunglei khawpuiah loh theih lohin bawlhhlawh thliar hran kalpui a ngaih thu a sawi a, "Lunglei Town Sanitation Task Force chuan hetianga kal hi ṭul a ti a, department lam pawhin ruahmanna fel tak an siam tawh a ni," a ti.

Lungleiah bawlhhlawh báwm sem tumna a awm rih loh thu sawiin Lawmawma Tochhawng chuan, "Solid Waste Managment Project siam mek a taka kalpui a nih hnuah BPL chhungkuate hnenah bawlhhlawh báwm subsidy-a pek tum a ni a, chhung tinte chu hmasawnna rahbi thar rap tura kan inpuahchah a ṭul," a ti a; bul ṭan tur an nih avangin fel tâwk lo a awm thei a, thawktu-te'n zirna an pek zel tur thu

a sawi.

Lunglei HPC Vice Chairman ṭawiawmtu bawrhsap Kulothungan A chuan, bawlhhlawh thliar hran chu India ram hmun tam takah kalpui a nih tawh thu sawiin, bawlhhlawh thliar chu Lunglei mipuite'n ṭha taka an zawm theih nan media-te'n theihtawpin zirtir se a duh thu a sawi.

Kulothungan A chuan, "State danga Swachh Dooth campaign kalpui tawh angin Lungleiah pawh khawpui chhunga self help group 158 hnuaia member-te'n in tinah kal kualin awareness campaign an kalpui dawn," a ti.

Lunglei khawpuiah hian vawiin aṭangin chhung tinte'n bawlhhlawh ṭawih thei leh ṭawih thei lo an thliar a ngai dawn a, Lunglei khawpui huam chhunga VC 24 zinga pakuaah UDPA department-in department lirthei hmangin bawlhhlawh a khawn ang a, VC 15-in anmahni veng/YMA motor hmangin an khawn thung dawn a ni.

UDPA department-in bawlhhlawh a khawnna veng pakua bikah chuan bawlhhlawh ṭawih thei lote chu kar tin Thawhṭanni aṭanga Zirtawpni thlengin lirthei pali hmangin an khawn dawn a, ṭawih theite chu kar tin Thawhlehni apiangin lirthei pali bawkin an khawn ang.

VC dang 15, VC/YMA ruahman motor hmanga khawn turte chuan ṭawih thei leh ṭawih thei lo khawn ní chu an veng mil leh remchan angin an siam thung dawn a ni.