April 17-a inthlang turin inbuatsaih Kan inpeih tawh - Returning Officer

Serchhip biala Assembly by-election awm tura returning officer (RO) Kumar Abhishek, Serchhip DC chuan, April 17, 2021-a inthlang turin an inbuatsaih thu a sawi a, "Inthlang tur hian kan inpeih tawh," a ti. Serchhip SP Stephen Lalrinawma pawhin, muanawm taka inthlan a nih theih nan theihtawp an chhuah thu a sawi bawk.

Nimina Vanglaini palaiin a pisaa a kawm­naah Kumar Abhi-shek chuan, Election Commission of India (ECI) leh Mizoram Chief Electoral Office (CEO) aṭangin inthlan vote thlak leh vote chhiar hun sawn a nih dawn leh dawn lohah thu dawn an la neih loh thu a sawi a, "Thu dawn kan la neih loh avangin ECI-in inthlan hun leh vote chhiar hun a bituk tawh zâwmin hma kan la a ni," a ti a; April 17-a inthlang turin ruahmanna an kalpui thu a sawi.

Serchhip RO chuan, Election Model Code of Conduct chungchangah complaint neuh neuh an dawn tawh thu sawiin, "Complaint lian tham kan la dawng lo. Complaint kan dawn chu kan bawhzui nghal zel. Keini chuan MCC hi khauh taka kenkawh kan tum," a ti.

Polling station ven uluk zual ngai bik (sensitive polling station) a awm loh thu sawiin Kumar Abhishek chuan, "Inthlan thianghlim leh felfai tak kan neih theih kan beisei a, chumi tur chuan hma kan la a ni," a ti a; inthlanna thianghlim leh felfai a awm theih nan Mizoram People Forum (MPF)-te nen la inhmuhkhawm an tum thu a sawi.

Kumar Abhishek chuan, Covid-19 avangin tun ṭum inthlan turah hian thil thar buatsaih an neih loh thu sawiin, "Covid-19 vanga inkhuahkhirhna hrang hrangte ṭha taka zawm a nih theih nan hma kan la dawn a, inkaih­hruaina dan zâwm lote chungah dan angin action lâk a ni ang," a ti.

Vanglaini palai zawhna chhangin Ser­chhip SP Stephen Lal­rinawma chuan, Serchhip bialah inthlan vanga buaina emaw, dan leh thupek kenkawh kawngah emaw tun hmain harsatna a awm ngai loh thu a sawi a, "Kan in­thlah­dah phah lo a, theihtawp kan chhuah," a ti a, dan bawhchhiatna awm theite thlei bik nei loin theihtawp chhuahin an vil niin a sawi.

Serchhip SP chuan, arm licence nei leh thu­buai nei ngun tawhte hming an chhinchhiah thu sawiin, "Arm licence neite chu eng emaw thulha lek chhuak mai thei an nih leh nih loh zir chian a ni. Thubuai nei ngunte lakah pawh a ṭul anga hmalak a ni ang. Hmun pawimawh laiah check gate-te siamin, patroling neih kan tum bawk," a ti.

Serchhip SP sawi danin, Serchhip district-a police awm zat chu inthlan hmachhawn turin an tam tâwk lo a, chuvang chuan state leh central aṭangin force pek belh an ni dawn a ni.