COVID-19: Mizoram dinhmun Hripui vei mi 5 hmuh belh a ni

March 30, Thawhlehni khan Mizoramah Covid-19 vei mi panga hmuh chhuah a ni a, nimin khan hripui laka fihlim tawh chhuahtir an awm lo.

Covid-19 vei hmuh tharte chu ZMC laboratory-a hmuh chhuah pahnih, TrueNAT-PCR hmanga Hnahthiala hmuh pakhat leh RAT hmanga Aizawla hmuh chhuah pathum an ni a; natna (symptom) lang chhuak mi pahnih leh kum 81 mi pakhat an tel.

Mizoramah Covid-19 vei mi 4,473 hmuh chhuah a ni tawh a, mipa 3,258 leh hmeichhia 1,215 an ni. Nimin tlai dar 5 thleng khan mi 4,434 (99.13%) chhuahtir an ni tawh a, mi 11 (0.25%) thi tawhin, enkawl mek mi 28 (0.62%) an awm.

Thawhlehni khan ZMC laboratory-ah swab sample 100, TrueNAT-PCR hmangin district pathumah sample pasarih leh RAT hmangin district pasarihah sample 571 endik a ni a; sample endik zawng zawng chu 678 niin, chu'ng aṭanga Covid-19 positive hmuh chhuah panga chu 0.74% a ni.

March 30, 2021 thlengin Mizoramah swab sample 2,52,400 endik a ni tawh a, chu'ng aṭanga Covid-19 positive hmuh tawh zat 4,473 chu 1.77% a ni. Hripui vei hmuh tawh zinga mi 2,132 chu Mizoram chhunga kái chhâwng an ni a, mi 2,341 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,663 hmuh chhuah a ni tawh a, TrueNAT-PCR hmangin 675 leh RAT hmangin 1,131 hmuh chhuah a ni tawh.

Mizorama district 11 zinga district pariat - Lunglei, Champhai, Kolasib, Serchhip, Lawngtlai, Mamit, Saitual leh Khawzawl district-ahte hripui vei an awm tawh rih lo a; Aizawl district (26) leh Siaha leh Hnahthial district (pakhat ve ve)-ah chiah an awm rih a ni.