Covid 19 endikna khawl lei thuai a ni ang - Health Minister
Health minister Dr R Lalthangliana chuan March 7, Inrinni khan Lengpui Airport-a Covid 19 laka Mizoram a him theih nana hmalak dan hrang hrang a enfiah.
Dr R Lalthangliana chuan Mizoramin Covid 19 endikna khawl a lei thuai tur thu sawiin, "Coronavirus laka himna tura tuna Mizoramin a tih theih chu an thisen lo lak a, phai lama thawn a ni rih mai," a ti a, Lengpui Airport a medical duty turte a ṭul anga dah belh an nih tur thu a sawi.
Health Minister hian Airport chhunga Covid 19 chungchangah rinhlelh leh endik ngai bikte dah hranna tur a hranpa a siam sample test leh collect-na tur siam mekte a enfiah nghal a ni. Tun dinhmunah Lengpui Airport-ah hian Covid-19 endiktu tur medical duty pasarih an awm.
Airport thuneitute chuan tun dinhmunah Lengpui Airport-ah hian airlines flight paruk a awm mek thu te, khualzin lo ṭumte nitin mi 300 aṭanga mi 500 velte dinhmun Health & Family Welfare-in an endik ṭhin thute leh airport-ah hian an khua a sik leh sik loh enna khawl hmangin doctor leh nurse-te'n khualzinte an endik ṭhin thute Health Minister hi an lo hrilh a ni. Health Minister hi Health principal director Dr F Lallianhlira hoin official-te'n an ṭawiawm a ni.