Tualṭo vaimím chi hnih thlang

Agriculture minister C Lalrinsanga chuan nimin khan a pisaah Mizorama tualṭo vaimím, state variety atana puan - mímpui chi khat leh puakzo chi khatte chu a tlangzarh a, loneitute chìn turin pek chhuah a ni ang.

Mizoram tualchhuak vaimím thlan chhuahna tur hian ICAR, Kolasib leh Agriculture department-te'n Mizoram hmun hrang hrang aṭangin vaimin chi hrang 70 chuang an la khawm a; ICAR, Kolasib leh Mizoram KVK hrang hrangte kaltlangin vaimin zinga danglam bikna nei, thar hlâwk tur, natna leh rannung laka him bikte thlan a ni.

Minister C Lalrinsanga chuan, "Tualṭo vaimim chi hnih, state variety-a puante hi a neitu nihna humhalh tura hmalak zui a ni dawn a, vaimim chi ṭha, a fang lian leh thar hlâwk takte hi ram economy chawi kânna atan hmanraw pawimawh tak a ni ang," a ti a; state variety atana puan leh chìn theih tura buatsaih a ni chu Mizoram tan leh loneitute tan hmasawnna a nih thu a sawi bawk.