Tour guide zir chhuakte thlah

Tourism department chuan nimin khan Vanapa Hall-ah Graduation Ceremony & Felicitation of Tour Guide an hmang a, Tourism minister Robert Romawia Royte khuallian niin, Tourism Board vice chairman TC Pachhunga khualzahawm a ni.

Robert Romawia Royte chuan, tourism leh industry sector-te'n Covid-19 hripui an tawrh nasat bik thu sawiin, "Khualzin an chàwl a, hotel leh restaurant-te khâr a ngai a, Tourism department hi Covid hripui donaah thawh hlâwk department an ni," a ti a; tourist lodge-te quarantine facility leh Covid care centre atan hman a nih bakah, thawktute pawh hman ṭangkai an nih thu a sawi.

Tourism Minister chuan, mumal takin tourism industry a kal dawna a lan thu sawiin, "Policy pawh a taka hmanga zár zo tur zingah tour guide, tour operator, travel agency-te leh mahnia eizawngte an tel a, limit nei lo a nih avangin ṭhang zel tur a ni," a ti a; tourist guide zir chhuakte chu khualzinte tan ṭhian ṭha nih tum turin a fuih.

Tour guide training atan hian Mizoram Youth Commission kaltlangin North Eastern Council aṭangin Rs. 13,00,000 hmuh a ni a; training chu 'Livelihood Generation for Returned Migrant Workers due to Pandemic Covid-19 Outbreak in Mizoram' hnuaiah mi 100 tana buatsaih a ni.

Training diltu mi 100 an tlin loh avangin open advertisement chhuah a ni a, MzSRLM hnuaia self help group member-te training pek tel niin, an vaiin mi 103 an ni. Training chu thla khat chhung kalpui a ni a, mi 103 zingah mi 95-in exam an hmachhawn a, mi 83 tlingin, mi 12 chu exam leh tura tih an ni thung.

Tour guide license pekte chu Mizoram sorkarin an hlawh tur guide fee a duang dawn a ni.