JJB-in Serchhip District Jail an enfiah

Serchhip district-a Juvenile Justice Board (JJB) hnuaia Jail Inspection Team chuan nimin khan principal magistrate JH Lalparmawii hoin Chhiahtlanga Serchhip District Jail an tlawh a; jail dinhmun leh naupang táng an awm leh awm loh an enfiah.

JJB Jail Inspection Team hi District Jail superintendent Laldingliana Chinzah hoin thawktute'n an lo dawngsawng a; jail-ah naupang kum tling lo táng an awm loh thu a lo hrilh.

Jail Superintendent sawi danin, District Jail-ah hian táng mi 35 an awm mek a, mipa 31 leh hmeichhia pali an ni. Mipa 26 leh hmeichhia pali (mi 30) chu thubuai ngaihtuah lai an ni a, mipa panga dang chu thubuai chinfel tawh, thiamloh chantirte an ni. Jail-ah hian Superintendent hoin thawktu mi 21 an awm mek a ni.

Serchhip District Jail Superintendent chuan, District Jail-a tángte tan vocational training neiin, puantah leh puanṭhui zirna an buatsaih thu te, jail-a tángte hâk tur an ṭhui thiam tawh thu leh Mizorama jail danga thawn chhuah tur ṭhui an tum thu te, hun rei tak thiamhnáng deh zirna an kalpui tawh chu an chhunzawm theih rih loh thute a sawi.

Laldingliana Chinzah chuan, Covid-19 léng avanga hun rei tak jail-a tángte tlawh leh kan theih loh chu March 17, 2021 aṭangin an titàwp a, tunah intlawh phal a nih tawh thu te, tángte tan rawngbawlna nei duh tan hun a awm theih rualin, hri leng vanga inkaihhruainate zawm a ṭul thute a sawi a; faina lamah theihtawp an chhuah thu a sawi bawk.