Index Testing and 90-909-90 atana thawhhona tur hawn a ni
Social Welfare minister Dr K Beichhua chuan nimin khan a pisaah HIV/AIDS donaa hmalakna thar Index Testing and 90-909-90 atana sorkar leh páwl dangte thawhhona tur a hawng.
Social Welfare Minister-in thawhhona thar a hawn tâk ang chuan, ITECH team chuan an thawhpui MSACS leh SHALOM-te nen IRCA hmunah a thláwnin service hrang hrang an pe dawn a ni.
Dr K Beichhua chuan, ruihhlo hman sual leh HIV/AIDS chungchanga Mizoram dinhmun chu sawi chhuah hrehawm leh zahthlak khawp a nih thu a sawi a, "Ṭan kan lâk nasat a ngai hle," a ti.
HIV/AIDS donaah ram hruaitute pawhin ṭan lâk a ṭulzia an hmu chiang tih sawiin K Beichhua chuan, "Tuna inenkawlna hmun neih mekte pawh changtlung zawka kalpui turin theihtawp chhuah mek a ni," a ti a; ruihhlo donaa hmalakna leh ruihhlo ngaite'n nunphung pangngai an zawh theihna tura din Jordan Centre, Seṭhawn chu Chief Minister-in a hawn thuai dawn thu a sawi.
Social Welfare Minister chuan, ruihhlo hman sual leh HIV natna chu thil kal kawp ang mai a nih thu sawiin, "Integrated Rehabilitation Centre for Addicts (IRCA) hmuna enkawlna dawngte zingah HIV vanga enkawlna mamawh leh hmalakpui ngai an awm ṭhin," a ti.
IRCA hmuna enkawlte'n HIV chungchangah awlsam leh tluantling zawka treatment an dawn theih nana hma la mektu Project Sunshine, UW-ITECH (University of Washington - International Training and Education Centre for Health) leh Mizoram Social Defense & Rehabilitation Board (State Level Coordinating Agency, MoSJE, Govt. of India)-te thawhhona chu Social Welfare & Tribal Affairs department-in ṭha an tih thu Minister chuan a sawi bawk.
IRCA-a free service dawn turte
1.Mizorama IRCA hmuna enkawlte tana HIV test tihsak.
2.IRCA-a enkawlte baseline investigation atana blood sample laksak leh ART bul ṭanpui.
3.IRCA hmuna enkawl mek HIV veite ART pek.
4.ART Refill - INTECH field team-te'n IRCA-ah ART an dah ang.
5.Viral load test thei chin tana blood sample IRCA hmuna lak.