Minister-in YMA inkhawmpui a hmanpui

Minister of state Lal­ruatkima chu nimin khan Victory School, Thenzawla Vantawng Group YMA Conference vawi 24-naah khuallian a ni a, YMA chu Mizo hnam humhimtu a nih thu a sawi.

MNF party thuchhuah tarlan danin, Vantawng Group YMA Conference hi an president Chawng­sangliana'n a kaihruai a; Lalruatkima chuan, "YMA hi Mizo hnam darthlalang a ni a, Mizo hnam humhimtu a ni bawk. Engtik ní-ah emaw chuan Zo fa ṭhendarha awmte hi rorelna pakhat hnuaiah kan la awm dawn a, chumi tur chuan kan inruahman zel a ngai a ni," a ti.

YMA-in faina leh chang­kanna te, hmasawn­nate Mizo tan a thlen tih sawiin, "Mizo hnam tan YMA hi a hlu tak zet. 'Ṭanpui ngaite ṭanpui' tih thuvawnah kan nei a, a súr a sa hnuaiah, zan tairêkah pawh YMA chuan ṭanpui ngaite a ṭanpui ṭhin a, hnam khai dingtu, mirethei leh hausate thliar lo pawl a ni," a ti a; YMA chu hnam lungphûm innghahna niin a sawi.

IPR Minister chuan, YMA chu mi tin ta a nih thu sawiin, "Kohhran leh party a sawi lo. Chîmrala kan awm lohna tur te, environment humhalh tur te, zirna lama hma kan sawn zelna turah te, faina lamahte hma kan la zel a. Zoram dung leh vang heti taka a fai chhan pawh YMA hmalakna vang a ni," a ti a; Mizo hnam chhiat ṭhatah YMA-in thûk takin mawh a phur tih sawiin, YMA member-te chu ṭang mar reng turin a chah.

Lalruatkima chuan, ram leh hnam humhalh nan fa nei tam turin YMA member-te a chah a, "Tuna kan awm danah hi chuan kum 50 a ral leh chuan Mizote hi kan tlem hle ang tih a hlauhawm. Mizo mipate innghahna tlak ni tura kan ṭana kan inen lêt a ngai. Mizo nulate pawh hnam dang fa hring lo hrâm turin ka ngen a che u," a ti. Central service-a tling thei tur khawpin zirna lamah ṭan lak a ngaih thu a sawi bawk.

Vantawng Group YMA-ah hian Kânghmun South, Buangpui, Neihloh, Zote South leh Thenzawl khuaa YMA branch pakuate an awm a ni.