Myanmar puala kawngzawh leh báwm dawh

Young Lai Association (YLA) bultumin March 30, Thawhlehni khan Lawngtlai khawpuiah Myanmar sipaiin mipui rorelna an paihthlak duh lohzia leh democracy tun din an duhzia lantir nan leh mipui laka sipai chet dan duh lohna lantir nan mipuiin kawng an zawh.

Kawngzawh hi hmun thum aṭangin ṭan a ni a, mi ṭhahnem tak telin, Areopagi-ah an intâwk khawm. Areopagi-ah hian LADC chief executive member Manghmung Chinzah leh Central YLA president HC Vanlalruatpuia ten thu an sawi a ni.

March 30 vêk khan Myanmar aṭanga Mizorama ráltlânte ṭanpui nan Lai Students Association Sub-Headquarters, Sangau chuan an khuaah báwm an dawh ṭan. Zirlaite veng hrang hrangah an kal kual a, Sangau bakah, a chhehvel khuaahte pawh kalpui an tum a ni.