Ngaihdam dil turin CM an phût

BJP, Mizoram Pradesh ṭhalaite chuan thuchhuah siamin, MNF sorkarin electric bill an tisang chu miretheite tan phurrit a nih dawn thu an tarlang a; chief minister Zoramthanga chu a thutiam anga a awm loh avangin mipui hnenah ngaihdam dil turin an phût.

BJP ṭhalaite chuan, Mizoram sorkarin electric bill thar tura a rawtna JERC-in a tihhniamsak chung pawha unit khat man Rs. 6.71 a ni chu mirethei tan a manganthlak dawn tih sawiin, "An insawithiamnaah mipui aṭanga complaint/ rawtna thlen an awm lo tih chu mahni thiam inchantirna mai a ni a, electric bill mai bakah, mipuiah tax tam taka an tihsan mai a la rinawm hle," an ti.

CM Zoramthanga chu a duhthusam apiang mipui hrilh mai mai tawh lo tura chahin BJP ṭhalaite chuan, "Pu Zoramthanga kaihhruai sorkar hian mipui tana harsatna an siam dawn a nih chuan, an tlin chhan an intiamna Rs. 3,00,000 sem vat turin kan phût. CM hi a thutiam anga a awm loh avangin mipui hnenah ngaihdam dil turin kan phût bawk a ni," an ti bawk.