Minister-in ACBOA inkhawmpui a hmanpui

Aizawl City Bus Owners’ Association (ACBOA) chuan nimin khan Synod Conference Centre-ah inkhawmpui vawi 47-na an hmang a, Transport minister TJ Lalnuntluanga'n a hmanpui.

TJ Lalnuntluanga chuan, ACBOA hruaitute nen thawhhona ṭha tak an neih thu sawiin, "Aizawl Smart City project kalpui mekah urbanization scheme hnuaia péng pawimawh tak Urban Transport chungchanga hmalaknaah Aizawlin hmél thar a hmuh theih nan min finchhuah ṭhin ka duh," a ti.

Transport Minister chuan, city bus-te chu Mizoram hmél lanna pawimawh tak pakhat a nih avangin an bus-te vawn fai leh enkawl ṭhat kawngah ṭan la turin city bus neitute leh enkawltute a chah a; passenger-te chunga hawihhâwm kawngah ṭan la zual turin a chah bawk.

ACBOA-in special road permit an lâk danah harsatna an tawh ṭhin chu a hriatpui thu sawiin Minister chuan, "Hemi chungchangah hian officer ruat bikte neiin, online kaltlanga awlsam zawka tihfel dan ngaihtuah mek a ni a, department hnuaia chhiah chi hrang hrang online-a pek a nih theih nan SBI nen inremna siamin, rei lo têah hman theih a ni ang," a ti.

Minister chuan, State Transport Authority-in bus fare tihdanglam chungchang a rêl pawh sorkarin a pawmpui thuai tur thu a sawi bawk a ni.