KHAWTHLIR

Nomination endik

Serchhip biala MLA by-election neih tura nomination thehluhte chu nimin khan election observer Lokesh Kumar hoin endik a ni a, nomination lut zawng zawngte pawm a ni. Inthlanah hian candidate paruk an awm dawn a, chu'ngte chu - Lalhriatrenga Chhangte (BJP), PC Laltlansanga (INC), Vanlalzawma (MNF), Lalduhoma (ZPM), Vanlalruata (PC) leh Ramhlun Edena (Independent)-te an ni.

Thisen pe

Lawngtlai College NSS unit chuan nimin khan an college-ah thisen pek an huaihawt a, Lawngtlai District Hospital tan thisen unit 45 an pe a, petute mipa 34 leh hmeichhia 11 an ni. Mizoran PYD Lawngtlai Pastor Bial pawhin an silver jubilee lawm nan March 30, Thawhlehni khan District Hospital tan thisen unit 19 an pe a, petute mipa 15 leh hmeichhia pali an ni.

Good Friday

Naktuk Zirtawpni hi Isua khenbeh ní, Good Friday a ni a, Mizorama kohhran hrang hrangte'n urhsûn takin an hmang dawn. Zanin hi lungngaih zan (Maundy Thursday) a ni a, kohhran hrang hrangte an inkhawm dawn a, Lalpa Zanriah Sakramen kîlho a ni ang. Roman Catholic Kohhran chuan naktukah Kraws Kawngzawh an nei dawn a ni. Good Friday a nih avangin naktukah Vanglaini a chhuak

lo ang.

Kâng tuar tanpui

Serchhip biala by-election neih tura ZPM candidate Lalduhoma chuan nimin zing khan March 29 zana Serchhip Dinthar Venga kângmei tuarte a tlawh a, ṭanpuina Rs. 15,000 a hlân. Kângmei tuarte chu a tawrhpui thu a hrilh a ni.

MGNREGA zirho

Nimin khan Kolasib-a Parish Hall-ah district bawrhsap Dr H Lalthangliana hoin Kolasib district-a VC-te'n MGNREGA Sensitisation Programme on Time and Motion Study an nei. Zirhonaah hian Kolasib district-a VC 56 aṭangin president leh secretary-te bakah, RD block tina BDO office-a technical assistant leh computer assistant-te an tel a ni.