ASEAN ram palaite'n Champhai an tlawh

Mizoram sorkarin a sawm anga Chapchar Kut lawmna chhimtu India rama Association of Southeast Asian Nations (ASEAN) ram palaite chuan March 7, Inrinni khan Champhai an tlawh. ASEAN ram palaite hi DC SL Naveen leh  district official dangte’n Circuit House-ah lo dawngsawngin medical screening leh self reporting form-te an tihfel hnuah chaw chhun an kilho.

SL Naveen chuan India ram hmun kilkhawr ber pawl Mizoram mai bakah Champhai district ambassador rualte’n an tlawh chu lawmawm a tih thu sawiin, an mamawh neihte district thuneitute hnena thlen hreh lo turin a chah a, hun ṭha leh duhawm tak hmang turin duhsakna a hlan.

ASEAN HoM chair­man Pu Bouenneme Chouanghom, Laos am­bassador chuan Cham­phai district thuneitute lo dawnsawn leh chawimawi danah an lawm takzet thu a saw. ASEAN ram palaite hian Myanmar ramah zan khat riaka Rihdil tlawh turin Inrinni chawhnu vek khan Champhai an chhuahsan a, Aizawl lam pana an haw lehnaah Khawzawl tlawh leh an tum a ni. ASEAN ram palai Champhai khawpui tlawhtute hi ram panga ambassador-te an ni a, an nupuite bakah official dangte'n an ṭawiawm a ni.