Vawiinah MP leh MLA bye-election Zing dar 7 aṭangin vote thlâk a ni dawn

Parliament member tur thlanna, Lok Sabha inthlanpui leh Aizawl West-I Assembly bye-election chu vawiinah neih a ni dawn ta a, zing dar 7 aṭanga tlai dar 5 thleng vote thlak hun hawn a ni ang. Tun ṭum Lok Sabha MP election-ah hian candidate paruk an awm a, Assembly bye-election-ah candidate pathum an awm.

Vote thlak huna bituk tlai dar 5-a thlak hman lo, polling area-a lut hmante chu zanlai dar 12 thleng vote thlak phalsak an ni dawn. Lok Sabha MP inthlan atan hian polling station (PS) 1,175 siam a ni a, Lawngtlai district-a Gegulyskura PS chu critical polling station awm chhun niin, sensitive PS 18 a awm.

Sensitive PS leh critical PS-te hi ramri hnaiha awm an ni hlawm a; Gegulyskura PS hi venhimna lama harsatna a awm vang ni loin, nikuma Assembly inthlanpuiah vote tla a ṭhat lutuk avang leh candidate pakhat an vote huk vanga critical polling station-a puan a ni.

Hmeichhe hlang duty-na tur polling station (Dingdi PS) 34 a awm a, polling station 30-ah webcasting (live video coverage) tih a ni dawn. Polling station-a inthlan buaipui turin mi 4,812 ruat a ni.

Lok Sabha inthlanpui awm turah Mizoram pumah voter 7,87,777 an awm a, chu'ng bakah chuan state danga awm, Mizorama vote nei (service voter) 4,687 awmin, tun ṭum Lok Sabha inthlana Mizorama voter zawng zawng chu mi 7,92,464 an ni. Aizawl West-I bikah voter 25,788 an awm a, mipa 12,143 leh hmeichhia 13,645 an ni.

Lok Sabha leh MLA bye-election-a vote tlate chu May 23, 2019-ah India ram hmun dang ruala chhiar a ni dawn a; MP inthlana vote tlate chu district election official-te'n an district ṭheuhah an chhiar dawn. Aizawl bikah chuan, MP inthlana vote tlate Assembly Annexe leh Hawla Indoor Stadium-ah chhiar a ni ang a, MLA inthlana vote tlate Govt. Aizawl College-ah chhiar a ni ang.

Tun ṭum Lok Sabha inthlan hi Mizoramah vawi ṭum 13-na tur a ni a, ṭum 12 inthlan awm tawhah ṭum hnih chu state sorkara ruling party candidate ni lo thlan tlin a ni tawh. Ṭum 13 zingah hian kum 1984 khan Lalduhoma chu chuhtu awm loa thlan tlin a ni a, hemi ṭum hian inthlan chuh tum mi pahnih chu an document a fel loh vangin hnâwl an ni.

Tarlan tawh angin, tun ṭuma Lok Sabha Mizoram constituency-a inthlan turah hian candidate paruk an awm a; chu'ngte chu - C Lalrosanga (MNF), Nirupam Chakma (BJP), TBC Lalvenchhunga (PRISM), Lalnghing­lova Hmar (Inde­pendent - Congress leh ZPM thlâwp), Lalhriatrenga Chhangte (Inde­pendent - Mizoram Democratic Worrior thlâwp) leh Lalthlamuani (Independent)-te an ni.

Aizawl West-I MLA by-election-a candi­date tur pathumte chu - Zothantluanga (MNF), Lalbuanga Sailo (Independent - Congress leh ZPM thlâwp) leh, Zaichhawna Hlawndo (Independent - Zoram Thar thlâwp) te an ni.

Tun ṭum inthlana duty tur polling party tam zawk chuan nimin khan an duty-na tur polling station an pan a; hmun hla deuha duty tur polling party-te erawh chuan April 9, Thawhlehni khan an duty-na tur an pan tawh thung.