Vaihlo ṭhat lohzia sikula zirtir a pawimawh - Chief Secretary

National Tobacco Control Programme, Mizoram chuan nimin khan Taxation conference hall-ah 'Strengthening tobacco control in Mizoram based on GATS-2 Report' tih zirhona an buatsaih a; khuallian Lalnunmawia Chuaungo, chief secretary chuan, vaihlo zûk leh hmuam ṭhat lohzia inzirtir chu sikul aṭanga ṭan a pawimawh thu a sawi.

Chief Secretary chuan, tun hma chuan Mizote'n rual pâwl nan leh intih pâ nan meizûk an hmang ṭhin tih sawiin, "Tunah chuan zûk leh hmuam ti ṭhin chu mi changkang lo leh mi dang phak lo tihna a ni tawh a, ram changkang zawkah chuan zûk leh hmuam an ti duh tawh lo. Vaihlo zûk leh hmuam ṭhat lohzia hi nasa zawka inzirtir a pawimawh a, social media-ah pawh nasa zawka tarlan ni se a hlâwk leh zual ang," a ti.

MIMER director Dr L Fimate chuan, India ram chu khawvela zûk leh hmuam ti nasa ber ram pahnihna a nih thu leh, vaihlo chu natna hrang hrang thlentu a nih bakah, thihna thlentu a nih avangin mi tinin an do a ngaih thu a sawi.

MJA president Zonunsanga Khiangte pawhin thu sawiin, zûk leh hmuam do kawnga chak zawka hmalak a nih theih nan tuna tobacco free village awm sate bakah, nau­pangteah anti-tobacco club tam zawk din tura hmalak ni se, chu'ng hmang chuan vaihlo hlauhawmzia inzirtir ni se, vaihlo dona a chak lehzual a rin thu a sawi a ni.

Inkhawm kaihruaitu National Health Mission mission director Dr Eric Zomawia chuan, vaihlo zûk leh hmuam vangin kum tin khawvel mi nuai 70 vel an thi ṭhin a, vaihlo zûk leh hmuam vangin Mizoramah pawh cancer vei leh thihpui an pun nasat thu a sawi.

Workshop-ah hian National Tobacco Control Programme state nodal officer Dr Jane R Ralte-in vaihlo zûk leh hmuama Mizoram dinhmun a sawifiah a; chawhnu lamah Cigratte & Other Tobacco Product Act (COTPA) chungchang zirho a ni.