Buaina awm loa inthlan a nih theih nan Police-in hma la turin mi tin an ngen

Mizoram police-a public relations officer (PRO) chuan thuchhuah siamin, vawiina Lok Sabha inthlanpui leh Aizawl West-I Assembly bye-election neih turah Mizoram police-te'n Election Commission of India (ECI) kaihhruaina angin venhimna lamah inbuatsaihna ṭha taka an kalpui thu a tarlang a; buaina leh harsatna awm loa mipuiin vote an thlak ṭheuh theih nan mi tinte hma la ṭheuh turin a ngen.

Police thuchhuah chuan, district hrang hranga superintendent of police (SP)-te'n DGP Balaji Srivastava kaihhruaina hnuaiah venhimna lama ruahmanna felfai taka an siam thu a tarlang a, "Tunah chuan district hrang hrangte inbuatsaihna zawh a ni tawh. Heng ruahmannate hi ECI leh police observer-te'n an enfiah reng a ni," a ti.

Police press release tarlan danin, inthlan atan hian sorkar department leh security mi leh sate aṭangin duty hrang hrang - Static Surveillance team, Flying Squad, Quick Response team, Patrolling team, Naka (check-post) leh polling station security-te tih a ni a; election notification chhuah a nih aṭangin Indian Constituion Ar­ticle 324 angin, sorkar hnathawk leh police-te chu ECI hnuaia thawk an ni a, ECI-in ti tura a tihte ṭha takin an ti a ni.

Nikuma Assembly general election-ah tlawmngai pawl hrang hrang leh kohhrante'n ṭha taka sorkar official-te an thawhpui avang­in boruak muanawm tak hnuaiah inthlanpui neih a ni tih sawiin Police PRO chuan, "Tun ṭumah pawh tun thlengin boruak ṭha tak hnuaiah inthlanpui inbuatsaihna a kal thei a, inthlanpui muanawm leh felfai tak kan nei leh ang tih kan beisei tlat a ni," a ti. Bru-te tan Kanhmunah special polling station siam a ni a, thlamuang leh felfai taka inthlanna an neih ngei an beisei thu an tarlang bawk.

Police thuchhuah chuan, inthlanpuiah hian buaina leh harsatna awm loa mipuiin vote an thlak ṭheuh theih nan leh rálmuang taka inthlan zawh a nih theih nan political party, tlawmngai pawl leh mi tinte hma la ṭheuh turin a ngen a ni.