KHAWTHLIR

Vote thlak turin Zirlaite sáwm
Mizo Students’ Union (MSU) Gen.Hqrs. chuan thuchhuah siamin, vawiina Mizoram aiawhtu tur Lok Sabha MP thlan turah Mizo zirlai zawng zawngte chu vote thlâk vek turin an sáwm. MSU chuan, "Inthlang ram kan nih angin, kan aiawh tur thlannaa vote thlak hi khua leh tui nihnaa kan tih tur a ni a, ram leh hnam nghahfâk kan nih angin, zirlaite chu vote hralh te, ruih theih thil leh thil thianghlim lote vanga mahni hlutna tibo thei thil reng reng ti lo turin kan ngen a ni," a ti.

Ram humhalh
Khawzawl Vengthar Branch YMA chuan, an veng thlanmual ram, hectare 92-a zau chhunga nungcha awmte chu an humhalh tlat tih an puang a; a chhunga vahrit nupa kâptu, an veng chhunga mi chu April thla tir khan Rs. 4,000 chawitirin thu sawiin, sakhi pakhat awm mek chu kâp an awm a nih chuan Rs. 10,000 an chawitir dawn bakah, sorkar thuneitute hnenah an hlan tur thu an tarlang.

Tlan phal lo
Traffic SP Rodingliana Chawngthu chuan thupek chhuahin, February 11 aṭanga March 13 chhunga Muallungthu - Khumtung kawng thawm ṭhat hna thawh tura ruahman chu ruahsûr ṭhin vangin April 13 thleng pawhsei a nih thu a tarlang a, "Ruahtui vangin resurfacing hna zawh mai thei a ni lo a, hna thawh chhunzawm a ngaih avangin April 14 aṭanga May 14 chhung, Thawhṭanni aṭanga Inrinni thleng zing dar aṭanga chhun dar 12 leh chawhnu dar 1:30 aṭanga tlai dar 5 inkarah lirthei tlân phal a ni lo," a ti.

Thulh hrih
MIZOFED Ltd. chuan thuchhuah siamin, Treasury Square-a an petrol pump chu Pathianni tih lohah chuan April 11, 2019 aṭangin darkar 24 chhung (nileng leh zankhua) an hawn tawh dawn thu an puang a, mahse Election Model Code of Conduct bawhchhiatna a nih avangin an ṭhulh hrih a ni.

Sem rual
Vawiina Lok Sabha MP inthlan lo awm tura Champhai district-a duty tur presiding officer, asst. presiding officer leh polling officer-te chu NIC conference hall-ah sem rual an ni. Duty turte sem rual hun hi DC Dr. Naveen Aggarwal-in a hman pui a, mipa 752 leh hmeichhia 64-te chu computer hmanga sem rual an ni.