MPCC-in Covid 19 hmuhchhuahna khawl Lei thuai turin Mizoram sorkar an phut
MPCC chuan thuchhuah siamin, Mizoram sorkarin Covid 19 hmuhchhuahna khawl tun thlenga a la nei lo chu mak an tih thu an tarlang a, lei thuai turin an phut.
Covid 19 chuan India ram mai ni loin, India hmarchhak a lo thlen tawh thu tarlangin MPCC chuan, "Guwahati leh ṭhenawm state khawpui dangahte Covid 19 vei nia rinhlelhte hmuhchhuaha dah hran an nih mek lai hian Mizoram dinhmun pawh a him lo ta takzetah kan ngai. Hetiang anih laia Mizoram sorkarin Mizoram venhim tuma theihtawp a chhuah hi a lawmawm kan ti. Mizoram chhim lam Siaha district lama Myanmar nena kan inkalpawhnate khar a ni ta pawh hi kan lawm hle a ni," an ti.
MPCC chuan sorkar hmalakna hi a tlai lu deuh hret nia an ngaih thu tarlangin, "China leh khawchhak lama hnathawka awm tam takin endikna hmachhawn loa ramri an paltlang hman nia a lan avangin a pawi kan ti hle a ni. Myanmar border khar chungchangah pawh khawtlang hruaitute leh NGO-te kuta dah ringawt loa tihtak zeta hma la turin Mizoram sorkar kan phut," an ti a, Myanmar nena inkalpawhna lian ber Champhai district leh hmun dangte pawh khar rih mai nise an duh thu an sawi.
Tun thlenga Mizoram sorkarin Covid 19 hmuhchhuahna khawl pakhat pawh a la nei lo leh thisen endik turte phai lama thawn zel a la ngai chu mak an tih thu tarlangin MPCC chuan, "A rang thei ang bera Coronavirus hmuhchhuahna khawl lei thuai turin Mizoram sorkar kan phut a ni. Chutih rualin, he natna hlauhawm tak dona kawngah hian Mizoram sorkar thlawp a, tanpui turin Congress party chu a inhuam reng a ni tih kan puang nghal a ni," an ti a, Covid 19-in Mizoram a lo thlen loh nan Pathian hnena ṭawngṭai turin Mizoram mipui leh kohhrante an ngen.