Lok Sabha inthlan leh MLA bye-election Mizoramah tluang taka neih a ni

Lok Sabha inthlanpui leh Aizawl West-I Assembly bye-election chu nimin khan Mizoramah neih a ni a, buaina leh harsatna lian tham thleng a awm hriat a ni lo. Hriat theih chinah, MP inthlanah vote 62.38% a tla a, MLA bye-election-ah vote 72.5% a tla.

Inthlan vote thlak hi zing dar 7-ah ṭan niin, tlai dar 5 thleng vote thlak hun hawn a ni a, polling station ṭhenkhatah chuan vote thlak hun a tawp hnua vote thlak hman lo, polling area-a lut hmante chu vote thlak chhunzawmtir an ni.

Tun ṭuma Lok Sabha Mizoram constituency-a inthlanah hian candidate paruk - C Lalrosanga (MNF), Nirupam Chakma (BJP), TBC Lalvenchhunga (PRISM), Lalnghinglova Hmar (Indepen­dent - Congress leh ZPM thlâwp), Lalhriatrenga Chhangte (Inde­pendent - Mizoram Democratic Worrior thlâwp) leh Lalthlamuani (Independent)-te an awm.

Aizawl West-I MLA by-election-ah candidate pathum an awm a; Zothantluanga (MNF), Lalbuanga Sailo (Independent - Congress leh ZPM thlâwp) leh Zaichhawna Hlawndo (Independent - Zoram Thar thlâwp) te an ni.

Lok Sabha inthlanpuiah hian Mizoram pumah voter 7,87,777 an awm a, chu'ng bakah chuan state danga awm, Mizorama vote nei (service voter) 4,687 awmin, tun ṭum Lok Sabha inthlana Mizorama voter zawng zawng chu mi 7,92,464 an ni. Aizawl West-I bikah voter 25,788 an awm a, mipa 12,143 leh hmeichhia 13,645 an ni. Nizan dar 7 thleng khan vote 62.38% a tla tawh.

Tripura transit camp-a awm mek Mizoram Bru-te tan Kanhmun khuaah special polling station siam a ni a, vote thlak turin Bru camp-a awm mi eng emaw zat an kal a, special polling station bikah hian vote 33.54% a tla a ni.

Tun ṭuma Lok Sabha inthlanah hian Mizoram pumah polling station 1,175 a awm a, Lawngtlai district-a Gegulyskura chu critical polling station awm chhun niin, sensitive polling station 18 a awm. Hmeichhe hlang duty-na polling station (Dingdi PS) 34 a awm a, polling station 30-ah webcasting (live video coverage) tih a ni bawk. Polling station-a inthlan buaipuitu mi 4,812 hman an ni.

MP general election leh MLA bye-election-a vote tlate hi May 23, 2019-ah India ram hmun dang ruala chhiar a ni dawn a; MP inthlana vote tlate chu district election official-te'n an district ṭheuhah an chhiar dawn. Aizawl bikah chuan, MP inthlana vote tlate Assembly Annexe leh Hawla Indoor Stadium-ah chhiar a ni ang a, MLA inthlana vote tlate Govt. Aizawl College-ah chhiar a ni ang.