Ruihhlo Rs. 46,86,572 hû man

Excise & Narcotics Department (END) chuan nimina Lok Sabha inthlanpui neih takah mipuiin thlamuang taka vote an thlak a, inthlanna muanawm leh felfai a awm theih nan inthlan pualin Mizoram chhung hmun hrang hrangah mobile squad team 20, flying squad team 20 leh surveillance team 11 an din a; inthlan puan hnuah zu leh ruihhlo dang Rs. 46,86,572 hû an man.

END hian Lok Sabha inthlanpui puan ní, March 10, 2019 aṭanga inthlan ní, nimin chhun dar 12 thleng khan rakzu leh sapzu litre 215 an man a; heroin kg. 1.013 leh ganja kg. 53.818 bakah, ruihhlo dang an man nual bawk. Zu an man zawng zawng chu tualchhunga hralhna ang chuan Rs. 9,99,387 man niin, ruihhlo dang an mante chu Rs. 36,87,185 man a ni a, a vaiin Rs. 46,86,572 man a ni.

Nimina inthlan vote thlak ni-ah pawh zu in phal loh ni, dry day a nih angin END chuan Aizawl khawpui leh a chhehvelah zu leh ruihhlo vanga buaina a thlen loh nan an duty a ni.

Zu leh ruihhlo dapa beihpui an thlâknaah khawtlang hruaitute leh mipui ṭawiawmna an hmu ṭha hle tih sawiin END chuan, "A bik takin, SRS, Central YMA leh Mizoram chhunga branch YMA hrang hrang leh tlawmngai pawl dangte chungah lawmthu kan sawi a ni," an ti.