Party hruaitute leh candidate-te an lâwm

Mizoram pumah Lok Sabha inthlanpui tluang tak leh ralmuang taka neih a nih avangin political party hrang hrang hruaitute leh candidate-te'n lawmawm an tih thu an sawi hlawm.

Mizoram sorkara rorel lai MNF party president Zoram­thanga chuan, MP inthlanah an candidate C Lalosanga chu a chak ngei a rin thu a sawi rualin, Mizorama chanchinbu lian ber Vanglaini-in MNF election symbol ní (sun) tia an tarlang chu siamṭhatna hun awm tawh lo a nih avangin pawi a tih thu a sawi.

Zoramthanga chuan, Vang­laini tihsual chu tihsual palh ni loin, tih luih nia a hriat thu sawiin, "Chanchinbu neitu leh a print-tu hi ZPM-a an hotu Pu K Sapdanga a ni a, joint editor Lalnghinglova Hmar hi an candidate a ni a, an tihluih liau liau a ni. Election Commission-ah kan thlen dawn a, a ṭul angin court-ah pawh hma kan la dawn. Kan khinte hi tute nge an nih heta ṭang hian a lang a, pawi kan ti a, kan thin pawh a ur khawp mai. Mahse, tun inthlanah hian hneh­na kan chan ngei kan ring," a ti.

MNF President sawi danin, CEO hnenah ngenna an thlen a, polling booth tinah MNF chhinchhiahna arsi a ni tiin a khát tâwka puan an ngen a, chu chu tih theih a nih loh chuan MNF-te au phalsak turin an ngen a ni.

MPCC & ZPM Joint Cam­paign Committee chairman Zo­din­tluanga chuan, Mizoramah inthlan­na muanawm tak neih a ni leh ta chu lawmawm a tih thu sawiin, inthlanna thianghlim tak a awm chu Mizoram mipui zawng zawngte vang a nih thu a sawi.

Zodintluanga chuan, inthlan dawnah political party-te kawng hrang hrangin an inbei ṭhin tih sawiin, "Campaign laiin inbei viau mah ila, thu belhchian dâwl loa inbeihna hi awm tawh lo se ka ti khawp mai. Thu dik hmangin inbei ila, dâwt hmangin kan khingpuite beih chíng tawh lo ila kan duh hle a ni," a ti.

Mizoram mipui chungah lawmthu sawiin Zodintluanga chuan, "Tun ṭum MP inthlan leh Assembly bye-election-a mipui candidate kan siam, Pu Lalnghinglova Hmar leh Pu Lalbuanga Sailo te hi an ṭha dun hle a, mipuite pawhin ṭha min tihpui niin kan hria. Mipui candidate kan siamte min vote saktu zawng zawng chungah lawmthu kan sawi a ni," a ti a; an candidate-te chu an tlin ngei an beisei thu a sawi.

MPCC-ZPM thlàwp mipui candidate Lalnghinglova Hmar chuan, mihring anga tih theih chinah chuan theihtawp a chhuah tih sawiin, "Tunah chuan Pathian kutah kan innghat tawh. Ka lo tling lo a nih chuan Pathianin ka tana MP nih hun atana ruat a la ni lo a ni ang. Theihtawp chhuahin kan campaign a, tuna kan campaign dan ang ni loin, pawisak nei miah loin campaign mah ila, Pathian hun ruat a nih loh chuan kan tling chuangin ka ring lo," a ti.

Lalnghinglova Hmar chuan, a campaign chhungin mipuite ṭawiawmna a dawn nasat thu sawiin, "Min thláwptu ZPM leh Congress party-te puihnaah ka lawm tak zet zet. Chu bakah, mipui min thláwptute chungah pawh thinlung takin lawmthu ka sawi a ni," a ti a; thlan tlin a nih chuan inthlan dawn laia a campaign au hlate tihlawhtling turin theihtawp a chhuah dawn thu a sawi.

MNF candidate C Lalrosanga chuan, Pathian khawngaihna leh mipui min khawngaina zarah tlin a inring hle tih a sawi a, Mzioram dung leh vâng ka fan kualnaah pawh mipui boruak a ṭha a, keimahni party leh keimah ngei pawh hi min duhsaka tlin loh kha chu a awm theih ka ring lo," a ti.

C Lalrosanga chuan, CAB vangin a dinhmun a hniam phah a rin loh thu sawiin, "CAB hmanga beih tâwk nasa hle mah ila, CAB chungchangah hian kan dinhmun a chiang a, candidate ka nih ang pawhin ka dinhmun chiang takin ka sawifiah vek tawh bawk," a ti a; party leh sorkar dinhmun a chiang sa reng a, mipui pawhin CAB vanga a iai a rin loh thu a sawi.