Vanglaini logo

KHAWTHLIR

PRISM zualko
PRISM party chuan April 10, Nilainia Vanglaini chhuaka article leh April 11, Ningania chhuaka article chu 'Right to Secession Bill' sawihnawmna thuziak nia an ngaih avangin, nimin chhun dar 12:30 khan chief electoral officer Asish Kundra hnenah complaint an thehlut. PRISM hian thuchhuah an siamah, MP inthlan tluang taka neih a ni leh an candidate vote-tute zawng zawng chungah an lawm thu an tarlang a ni.

Maxicab chesualah thi
Nimin khan maxicab MZ-06 4630 chu Hmuifang tlanga bawlhhlawh paihna khâmah tlân liamin, khâm sang takah a tla a, chuang awm chhun, a khalhtu Benjamin Lalfakawma (31) s/o Lalngailiana, Lamslang, Meghalaya chu a hmunah a thi. Thu dawn danin, Benjamin Lalngailiana khalh maxicab hi Lok Sabha inthlan atan hman niin, Sailam polling station-a duty-te phurtu a ni a; a mi phurhte Sailama a dah hnuah Nilaini zan khan Sumsuih lamah a lêng a, Sailam a pan leh lamah zan dar 10-11 velah a chesual nia rin a ni. Maxicab chetsual thu hi nimin chhhun dar 12 vel khan hriat a ni a, nimin chawhnu dar 3 vel khan a ruang lak chhuah a ni. Motor hi Benjamin Lalawmpuia, Serchhip ta a ni.

Kawng siam dawn
PWD-in April 14, Pathianniah Armed Veng aṭanga Electric Veng (Chhinga Veng area) panna Thanṭhuama in bul kawng pêngṭhuam lai siam rem hna an thawk dawn a, hei vang hian hna thawh hun chhungin kawngpuiah lirthei reng reng tlan phal a ni dawn lo tih, Traffic SP Rodingliana Chawngthu chuan thupek chhuahin a tarlang a; hnathawh tibuai thei tura kawngpui sira lirthei leh bungraw dah phal a ni lo tih a puang bawk. Thupek hi kawng siam chhung zawng atan a ni a; chhiatrupna thil kângmei leh rîkrum kaihhnawiha duty leh dan leh thupek pawimawh bika duty-te chet velna a huam lo thung.

Rs. 4,81,000 sem
Mizoram Presbyterian Kohhran Synod chuan kumin March thla chhunga khan Synod Relief Fund aṭangin chhawmdawlna Rs. 4,81,000 an sem chhuak. March thla chhunga chhawmdawlna sum an pek chhuah dan chu - damlote hnenan Rs. 88,000, kângmei tuarte hnenah Rs. 35,000, khawsak harsate hnenah Rs. 8,000 leh kohhran ṭanpuina Rs. 3,50,000-te a ni.