CEO-ah MPCC-ZPM an zualko

Lunglei District Election Officer (DEO) pisa leh Lunglei district khaw ṭhenkhata polling booth bangahte Lok Sabha MP candidate hming ziah dan indawtah dik lo a awm avangin MPCC-ZPM chuan nimin khan chief electoral officer (CEO) Ashish Kundra hnenah complaint an thehlut.

MPCC-ZPM tarlan danin, Lunglei DEO (DC ni bawk) office-a notice board-ah MP election-a candidate-te hming chu a dik loa târ a ni a; independent candidate pahnih - Lalnghinglova Hmar leh Lalhriatrenga Chhangte te serial number thlak­thleng a ni.

Appendix-I, Election Commission of India (ECI)-in MP candidate-te hming EVM ballot unit-a a rem danah Lalnghing­lova Hmar chu serial no. 5-ah dah a nih laiin, Appendix-II ah chuan serial no. 5-ah Lalhriatrenga Chhangte hming dah a ni. Lunglei DEO pisa notice board-a an târ chhuah ang chu Thorang constituency chhunga khaw hrang hranga polling Booth-ahte leh Lung­lei khawpui chhunga veng ṭhenkhata polling booth bangahte târ a ni.

Candidate-te hming ziah dan indawt, a dik loa târ chhuah chuan mipui a tibuai hle nia sawiin, MPCC-ZPM chuan, "He thil hi tum luih rêng vanga mipui (voter)-te tihchî-âi tumna leh boruak tih­chhiat tumna ni ngeia hriain MPCC & ZPM Joint Campaign Committee chuan dan anga action la turin CEO, ECI, Mizoram hnenah complaint kan thehlut a ni," an ti.

MPCC-ZPM ṭhalaite chuan hming dik loa tar chhuah an duh lohzia lantir nan nimin khan Lunglei DEO lehkha dik lote chu Vanapa Hall kawtah an hâl a ni.