Kohhran Hmeichhe Rorel Inkhawm a ṭiak

Mizoram Presbyterian Koh­hran Hmeichhe Rorel Inkhawm vawi 10-na, March 6, Zirtawpni zana Ramhlun Venglai Kohhran biak-ina nghah chu nizan khan a ṭiak. Kohhran Hmeichhiate hian zirlaite tana ṭawngṭai rual an rêl.

Kohhran Hmeichhe Rorel Inkhawmah hian Inrinni khan chairman Lalrinkimi kaihhruaiin rorel a ni a; "Ram chhûng leh ram páwna zirlaite tana ṭawngṭai rual ni se," an ti a, "Pawngsual leh hleihlenna laka hmeichhiate leh naupangte an him theih nân thla thar ṭawngṭai thupuiah telh ni se," an ti bawk.

Rorel Inkhawmah hian budget atan Rs. 42,00,000 an pawm a; chungte chu Central budget Rs. 15,00,00 leh Women Centre atan Rs. 27,00,000 a ni. "Ram pum huapin awmni khamin ram tan sual thupha chawia 

ṭawngṭai ni se," an ti a; Central Committee bawhzui turin an dah. Synod Hospital-a Paediatric Ward NICU-a hman tur Neonatal Ventilator lei an rél a ni.

Kum 2021-a Inkhawmpui Lian chu East Lungdar Pastor Bialin an thleng dawn a, kum 2022-a Rorel Inkhawm thleng turin Mission Veng Kohhran an thlang. Kum 2023-a Inkhawmpui Lian thleng turin Darlawn Pastor Bial leh kum 2024-a Rorel Inkhawm thleng turin Dawrpui Kohhran an thlang bawk.

Kumin hi Kohhran Hmeichhe inelna pakhat, Kristian chhung­kaw dinhmun tehna kum 50 tlin champha a ni a, Kristian chhungkaw dinhmun tehnaa ti ṭha ber NE Khawdungsei Bial hnenah Synod secretary Rev. Vanlalrova Khiangte-in nomawi a hlân. Rorel Inkhawmah hian palai 895 an kal a ni. Golden jubilee hriatrengna lung chu Inrinnia rorel ṭan hmain Synod moderator Rev. R Lalchangliana'n a hawng. 

Kohhran Hmeichhe General Secretary report-a a lan danin, January - December 2019 chhung khan kohhran 874 leh branch church 96 an awm a, chhungkua zawng zawng 1,12,177 aṭangin ni tina buhfaiṭhàm ṭhâm ziah chu 98.34% an ni a; ni tin chhung inkhawm nei thei zat chu 68.77% an ni thung.