MP inthlanah vote 63.08% a tla

April 11, Ningania Mizorama Lok Sabha inthlanpuia vote tla zat chu hriat kim a ni tawh a, mi 4,96,927-in vote thlakin, vote tla percentage chu 63.08 a ni. Vote thlakna electronic voting machine (EVM) khawl hrang hrangte chu hman a nihna district ṭheuha strong room-ah dah luh a ni.

Tun ṭuma Lok Sabha MP tur thlannaah hian Mizoram pumah vote 7,87,782 awmin, mipa 3,83,603 leh hmeichhia 4,04,169 an ni a, nihna thlak (trans-gender) mi panga an awm. Mizoram puma voter 7,87,782 zinga 4,96,927-in vote an thlak a, chu'ngte chu mipa 2,43,968 leh hmeichhia 2,52,710 an ni. Mipa vote tla ṭha zawkin, 63.60% a tla a, hmeichhe vote tla chu 62.53 a ni thung.

Lawngtlai West biala Chamdurtlang-II polling station-ah voter 72 zinga 71-in vote an thlak a, mi pakhat chiahin vote thlak loin, vote tla chu 98.61% a ni a; Mizoram pumah vote thlak ṭhatna ber a ni.

Mamit district pumah vote 63.15% a tla a; Hachhek constituency-ah 58.61%, Dampa-ah 67.43% leh Mamit bialah 64.42% a tla. Mamit district-a inthlan dan thlir letin nimin khan DC Conference Hall-ah general observer Akshay Sood hoin Election official-te leh political party aiawhte an ṭhukhawm.

Kolasib district-ah chuan polling station 85-ah vote thlak a ni a, district pumah vote 61.95% a tla a, mipaah 61.70% leh hmei­chhiaah 62.19% a ni. Kum 2014-a Lok Sabha inthlanah chuan vote 57.92% a tla a, kuminah 4.03%-in a pung. Kuminah hian Tuirial bialah 62.16%, Kolasib bialah 61.15% leh Serlui bialah 62.56% a tla a ni.

Champhai district-a constituency pangaa vote tlak dan chu Lengteng 60.18%, Tuichangah 61.69%, Champhai North 62.45%, Champhai South 61.50% leh East Tuipui 60.90% a ni a; vote thlakna EVM-te chu strong room-ah dah luh kim a ni tawh.

Serchhip district-ah chuan polling station 77-ah voter 49,896 zinga 31,892-in vote an thlak a, vote tla percentage chu 63.92% a ni. District chhung constituency pathuma vote tlak dan chu Serchhip bial polling station 23-ah 11,841 (64.48%), Tuikuma polling station 29-ah vote 10,422 (65.93%) leh Hrangturzo biala polling station 25-ah vote 9,629 (61.01%) a ni.

Lunglei district-ah chuan voter 1,08,135 zinga mi 70,350-in vote an thlak a, vote tla chu 64.16% a ni. District chhunga con­stituency pasarih zinga vote tlak ṭhatna ber West Tuipui bialah 72.30% a tla a, a tlak ṭhat lohna ber Lunglei South bialah 59.91% chiah a tla thung.

Lunglei district-a EVM leh VVPAT hmante chu Ningani zan khan strong room awmna Saikuti Hall-ah dah luh kim a ni a; nimin zing khan Lunglei district tana general observer H Lallien Songate leh accessibility observer Sangdingliana ten an enfiah a ni.

Lawngtlai district-ah pawh polling station 165-ah tluang taka vote thlak a ni a, district pumah voter 82,711 zinga 53,515 (64.70%)-in vote an thlak. District chhunga constituency pathuma vote tlak dan chu - polling station 62 awmna Tuichawng bialah vote 23,450 (74.52%), polling station 68 awmna Lawngtlai West-ah vote 17,627 (65.15%) leh, polling station 35 awmna Lawngtlai East-ah vote 12,438 (51.43%) a tla a ni.