MPCC leh ZPM-te'n lawmthu an sawi Serial no. tih dik lohah action lak an phut

MPCC & ZPM chuan thuchhuah siamin, Lok Sabha inthlanpui leh Aizawl West-I Assembly bye-election tluang taka zawh a ni chu lawmawm an tih thu leh, an can­didate-te vote petu zawng zawng chungah an lawm thu an tarlang a; MP election candidate-te serial number Lunglei district-a tih dik loh chungchanga complaint an thehluhah, dan anga action lak a nih ngei an phut thu an sawi.

Thuchhuah chuan, "MP election leh MLA by-election tluang taka neih zawh a ni ta hi MPCC leh ZPM chuan lawmawm kan ti hle. Khua leh tui kan nih anga mawhphurhna hlen a, vote thlaktu mipui zawng zawng leh mipui candidate-te pahnih - Lalnghinglova Hmar (MP candidate) leh Lalbuanga Sailo (MLA candidate) vote-tu zawng zawngte chungah lawmthu kan sawi a ni," a ti.

MPCC & ZPM chuan, Lunglei district-a Elec­tion official-ten MP candidate list an tih­chhuaha serial no. 5 - Lalnghinglova Hmar leh serial no. 4 Lalhriatrenga Chhangte te serial no. an dah thlakthleng chu pawi an tih thu sawiin, "Thingtlang hmun tam takah mipui candidate Lalnghinglova Hmar-in vote a hloh ṭeuh dawn niin kan hria a, pawi kan tiin mipuite hruai sual tura MNF sorkar hmalakna pakhat a ni ang tih kan hlau hle," an ti. Hemi chungchanga CEO hnena April 11, Ningani chawhnua complaint an thehluh avangin, dan ang taka action lak a nih ngei an beisei thu an tarlang.

MPCC & ZPM Publi­city Committee chuan, Vanglaini chanchinbuin MNF party symbol chungchanga tihsual an neih vanga MP candidate Lalnghinglova Hmar show cause notice pek a ni chu an hrethiam lo hle tih sawiin, "Pu Lalnghing­lova hi Vanglaini publisher leh editor a ni lo a, he thilah hian mawhphurhna a nei lo," an ti.

Party symbol tarlan dik loh chungchangah MNF-in complaint an siam duh a nih pawhin, Vanglaini publisher/editor laka siam tur zawk a nih thu sawiin, "MP candidate Lalnghinglova Hmar an hmer tel ṭâlh hi a rilru chhiat thlak kan ti a, politics hri ṭha lo tak, mipui rilru hruai sual tumna dik tak niin kan ngai," an ti a; Vanglaini chanchinbu hminga a neitupain ngaihdam a dil tawh hnu pawha MNF-in an la um zui zel chu a Mizo lo hlea an hriat thu an sawi bawk.