2018-19 chhunga thisen pek unit 27,274 Pek bik nei lo a thlawna pek 3.27%-in a ṭhang

Sorkar kum liam ta, April 1, 2018 - March 31, 2019 chhung khan Mizoram pumah thisen unit 27,274 pek a ni a, chu'ng zinga unit 23,629 chu pek bik nei loa a thlawna pek (voluntary donation) a ni a, 86.63% a ni. Voluntary donation-ah hian Serchhip District Hospital a sang ber a; Mizoram puma voluntary donation chu kum 2017-18 aiin 2018-19 ah 3.27%-in a sang zawk.

Mizoram State AIDS Control Society (MSACS) Blood Safety Cell chuan National AIDS Control Organisa­tion (NACO) hnuaia awm an nih angin NACO-in a pawmpui bik chiah an chhinchhiah rih a; Mizoram district pariata blood bank 10-a thisen pek zat an chhinchhiah a, State Referral Hospital (MIMER) chu January 17, 2019 aṭangin thisen pek ṭan ni mah se, NACO-in a la lâk (puih) loh avangin MSACS record-ah an la tel lo.

MSACS chhinchhiah blood bank 10 bikah sorkar kum liam ta, April 1, 2018 - March 31, 2019 chhunga Mizoram pumah thisen unit 27,079 pek a ni a, chu'ng zinga unit 23,434 chu pek bik nei loa a thlawna pek (voluntary donation) a ni a, 86.54% a ni. Pek bik neia pek (replacement) unit 3,645 (13.46%) a awm a; blood bank 10-te'n blood donation camp an neih belhkhawm chu ṭum 458 a ni a, camp aṭangin thisen unit 18,653 (68.88%) pek a ni.

Kum hmasa April 2017 - March 2018 chhung khan thisen unit 26,248 pek a ni a, voluntary donation chu unit 21,880 (83.36%) a ni. MSACS chhinchhiah blood bank 10 bikah, kum 2017-18 aiin kum 2018-19 chhunga thisen pek unit 931-in a tam zawk a; a thlawna thisen pek zat pawh 3.18%-in a tam zawk a ni. Kum 2017-18 chhung khan blood donation camp 433 neih a ni a, camp aṭangin thise unit 17,380 hmuh a ni.

Kum 2018-19 chhunga voluntary blood donation sanna ber chu Serchhip District Hospital a ni a, thisen pek zawng zawng unit 1,085 zinga unit 1,055 chu a thlawna pek a ni a, 97.23% a tling. Champhai District Hospital-ah chuan thisen pek zawng zawng unit 1,335 zinga unit 1,258 (94.23%) chu a thlawna pek a ni.

Lawngtlai District Hospital chu voluntary donation hniamna ber a ni thung a, thisen pek zat unit 1,290 zinga unit 901 chiah a thlawna pek a ni a, chu chu 69.84% a ni. A thlawna pek hniam lam lama pahnihna chu Lunglei Civil Hospital niin, 73.19% a ni.

Mizorama model blood bank awm chhun, Aizawl Civil Hospital blood bank-in thisen dawng tam berin, unit 14,027 an dawng a, chu'ng zinga unit 12,471 (88.91%) chu voluntary donation a ni a; donation camp ṭum 156 neiin, chu'ng aṭang chuan thisen unit 9,296 an hmu.

Thisen dawng tam ber dawttu chu Synod Hospital blood bank a ni a, unit 3,099 an hmu a, chu'ng zinga unit 2,680 (86.48%) chu a thlawna pek a ni a; donation camp vawi 76 an neihah thisen unit 2,352 an hmu. Lunglei Civil Hospital-in thisen unit 2,317 hmuin, voluntary donation chu unit 1,696 a ni a; donation camp ṭum 36 an nei a, camp aṭangin thisen unit 1,409 an dawng a ni.

MSACS record-a la tel lo State Referral Hospital blood bank-ah chuan kumin January 17 aṭanga March 31 thleng khan thisen unit 195 pek a ni tawh a, voluntary donation vek a ni. January thlaa unit 50, February thlaah unit 82 leh March thlaah unit 63 an dawng a; heng thla pathumah hian donation camp ṭum hnih ṭheuh an nei bawk.

State Referral Hospital-a thisen pekte nen hian April 2018 - March 2019 chhunga Mizorama thisen pek zawng zawng chu unit 27,274 a ni a, chu'ng zinga unit 23,629 chu voluntary donation niin, a thlawna pek zat hi 86.63% a tling.

Thisen pekin hma a sawn theihna tura hma latu pawl, Association for Voluntary Blood Donation (AVBD) chuan kum 2018-19 chhunga voluntary blood donation target an siam chu 90% a ni a, mahse, target an siam hi 3.46%-in an phâk lo. AVBD hruaitute chuan, mi nunna chhanna tura phal taka thisen hlu tak petu zawng zawng chungah lawmthu an sawi a ni.