Vote thlaktute leh inthlan buaipuitute chungah Zorama'n lawmthu a sawi

MNF president Zoramthanga, chief minister chuan, tluang tak leh muanawm taka vote thlak fel a ni ta chu lawmmawm a tih thu a sawi a, "Zoram mipui vote thlaktu zawng zawng leh election-a thawk leh duty zawng zawngte hnenah lawmthu ka sawi a ni," a ti.

Zoramthanga hian nimin khan Mizo Hnam Runa inkhawmah thu sawiin, Vanglaini chanchinbuin siamṭhat lehna hun awm tawh loa voter-te leh thil hre lo zawkte tibuai thei turin MNF symbol a ziak dik lo tih sawiin, "MNF symbol an ziak dik lo hi ka dem tak zet. Tun ṭum hi an vawi khat ziah dik lohna a ni lo a; Pu F Malsawma, Kawnpui biala a din ṭumin hetiang hi a lo thleng tawh. Eng party tan pawh hetiang thil an chunga a thleng hi a ṭha lo a, a thlen tawh lohna turin hma kan la dawn," a ti a; Election department leh an party-in Vanglaini lakah FIR an thehluh thu a sawi.

MNF President chuan, hnam movement chhût ṭhin a pawimawh thu sawiin, "China aṭangin Burma kaltlangin he lai ram ruakah hian min dah a, Chittagong leh Agartala phaizáwl ṭha thleng thla loin kan tàwp a, heta awm tura dah hi kan ni. Chanchin ṭhaa min kaih harh phahna ni turin Alexandrapur kan rûn a, Chanchin ṭhain a rawn thleng a, kum 60 vel chhungin zaa za Kristian kan ni. Zorama kan awm leh Chanchin ṭha pek kan ni hi lal thuthlung a ni," a ti.

Mizoram leh hnam thuthlung chu mautâmin a hmeh per thu sawiin Zoramthanga chuan, "Sang tam tak thisen a luang a, he hnam thuthlung hi thisena tihngheh, baptist a ni. Pathianin hnam thuthlung a tihngheh chhan hi tum a nei a, hmanruaa Mizote min hman a tum a ni. Kan ngaihtuah a ngai. Kum 1966-ah ram a buai a, MNF din hnuah party tam tak a ding tawh a, an ral zel a ni," a ti a, chanchin ṭha hril tura he hnam min dahna thuthlung atan MNF chu duan a nih thu a sawi.

MNF President chuan, mi ṭhenkhatin tih fuh tumin kawr hâk an thlak zin thu sawiin, "An party kalpui a zuih ral ngun hle. An nihna leh an zawm an thlâk zing em em a, mipuiin han zawm dawn mah ila min lo inthlaksan leh daih ṭhin. Kan ram enkawl tur hian ngheh a pawimawh. A chángin an NDA a, a cháng leh zuk luh thûk bik tumin lehkha hran an lo zuk thehlut a, AMC leh bye-election-ah BJP an thawhpui a ni. Hun a kal leh deuh a, 'issue base-in' zu zuar nen an thawk dun leh mai a, duh duha chang thei, duh duh ni thei an ni," a ti.