Aizawl district-a vote tlak dan enfiah

Nimin khan Aizawl District Election Officer (DEO), Aizawl bawrhsap ni bawk pisaah Lok Sabha general election vote thlak zawh tak enfiahna leh zirchianna, Scrutiny of Form 17A neih a ni a; Aizawl district tana election general observer Dr Mamatha hoin Aizawl district-a polling station hrang hrangte report an enfiah.

Dr Mamatha chuan, boruak muanawm tak hnuaia inthlanna hlawhtling tak neih a nih thu sawiin, "EVM leh VVPAT lamah harsat lian tham kan tâwk lo a, in­thlan hlawhtling taka kalpui a nih theih nana polling station hrang hranga tlawmngai pawl inpe tak tak hmuh tur an awm kha a ropui hle. Rualbanlote'n vote an thlak ve theih nan polling station-ah rua­hmanna ṭha tak siam a ni wheelchair-te pawh ṭangkai taka hman a ni," a ti.

General observer Honmilee Teronpi pawh­in thu sawiin, vote thlak turte ṭhut hahdam nan polling station hrang hranga ṭhutthleng dah a ni chu state dangah a la hmuh ngai loh thu a sawi a, tlawmngai pawlte'n ngawrh taka inthlan an vilpui chu lawmawm a tih thu a sawi bawk.

Assembly constituency-a vote tlak dan chawhrual aia 15% aia tam emaw, tlem emaw polling station pakhatah vote tla a awm chuan post polled scrutiny hmangin vote tla a danglam bikna polling station chu zir bing ṭhin a ni a; meeting-ah hian EVM/VVPAT chhia te, EPIC ni lo hmanga vote tlak tam lamin 25% a pêl em tih te, polling station-ah tender voter panga aia tam an awm em tihte enfiahna a ni.