District hrang hrangah inthlan thlir let a ni

Lok Sabha inthlanpuiah Mizoram bikah vote thlak zawh a ni a; nimin khan district hrang hrangah election official-te'n general observer-te hoin inthlan vote thlak an thlir let.

Lungleiah chuan Convention Centre-ah nimin khan inthlan thlirletna leh enfiahna neih a ni a, Lunglei DEO K Lalrinzuali'n kaihruaiin, Lunglei district tana general observer H Lallien Songate hoin enfiah a ni.

H Lallien Songate chuan, Lung­lei district chhunga inthlan­na felfai leh muanawm neih a nih avangin Election Com­mission of India (ECI) aiawh­in lawmthu a sawi a; Saikuti Hall-a polling official-te lo dawnsawn dan chu hmun danga a la hmuh ngai loh a nih thu sawiin, "Inthlanna tluang taka kan neih theih chhan chu polling official-te leh a kaihhnawih dang­te nena thawhhona ṭhat vang a ni a, Dingdi polling sta­tion-a hmeichhia hlang duty-te ṭangkai taka hman theih an ni a, a lungawithlak hle a ni," a ti.

Lunglei DEO K Lalrinzuali chuan, an district-ah harsatna lian tham a thleng lo tih sawiin, "Malsuri khuaah erawh chuan lei a chhiat avangin polling official ṭhenkhatte kea an kal a ngaih phah a ni," a ti. Meeting-ah hian Election officer James Lalnithanga kaihhruaiin constituency pasariha polling station pakhat ṭheuh enfiah a ni.

Champhaiah chuan General Observer Room-ah post polled scrutiny neih a ni a, Champhai leh Serchhip district tana general observer Bidol Tayeng-in a hmanpui.

Scrutiny-ah hian Champhai DEO Dr Naveen Aggarwal bakah political party aiawhte an tel a; political party aiawhte chu zawhfiah duh leh sawisel duh an neihte sawina hun siamsak ni mahse, harsatna leh sawisel tur an neih loh thu an sawi.

Meeting-ah hian Presiding Officers Diaries, Form 17-a voter ziah luhna leh lehkha pawimawh dangte endik a ni a; EVM/VVPAT chhia te, EPIC ni lo hmanga vote tlak tam lamin za zela 25 a pêl em tih te, polling station-ah tender voter panga aia tam an awm em tihte enfiah a ni a, thil dik lo hmuh a ni lo.

Champhai district-a Assembly constituency panga Lengteng, Tuichang, Champhai North, Champhai South leh East Tuipui biala polling station 137-tea vote tlak dan leh vote thlâk kalpui danah felhlel a awm leh awm loh enfiah a ni.

Mamitah pawh DC pisa conference hall-ah Mamit-ah general observer Akshay Sood hoin political party hrang hrang aiawhte nen Mamit district chhunga polling station 116 leh Kanhmuna Bru-te tan bika siam special polling station pakuaa vote tlak dan tlangpui leh thil danglam thlengte thlir let a ni.

Scrutiny neihnaah hian political party aiawhte chuan, vote thlak danah lungawi lohna an neih loh thu leh Mamit district chhungah thil duhawm lo thleng leh sawisel ngai a awm loh thu an sawi a; MLA inthlan aia vote tla a tlem zawk pawh thil thleng ṭhin pangngai a nih thu an sawi.

General Observer chuan, Mizoram boruak nuam tak hnuaiah muanawm leh felfai taka vote thlak a ni chu lawmawm a tih thu a sawi a; DEO Dr Lalrozama chuan, tluang taka vote thlak a nih theihna tura thawktu zawng zawngte inpeknaah lawmthu a sawi bawk.