ATC-in valedictory service hmang

Aizawl Theological College (ATC) chuan nimin khan an campus-a chapel-ah an zirlai chhuakte thlahna inkhawm, Valedictory Service an hmang a; BD zo thar mi 27, DCPC zir zo mi pathum, master of theology (M.Th) zir zo mi 34 leh kumina doctor of theology (D.Th) zo tur mi pahnih, an vaiin mi 66 an thlah.

Valedictory Service hi ATC principal Rev. Prof. Vanlalnghaka Ralte-in a kaihhruai a; Synod senior executive secretary Rev. Lianhmingthanga Sailo-in zirlai chhuakte hnenah certificate a hlan. Rev. Lianhmingthanga Sailo chuan, zirlai chhuak turte chu taima leh ṭhahnemngai taka rawngbawl a, thil dang zawng aia Pathian leh a rawngbawl hna ngai pawimawh tlat turin a fuih.

Zirlaite ti ṭhate hnenah Synod secretary Rev. R Vanlalnghaka'n lawmman chi hrang pasarih a sem a; zirlai baka thil tihhona hrang hranga zirlaite'n ṭha bera an ngaih, ballot paper hmanga an thlan hnena hlan ṭhin, Upa R Zobela Memorial Prize leh BD final year zinga thu sawi thiam bera thlan Rev. Liandova Memorial Prize-te chu C Zaihnuna, New Champhai-in a dawng be ve a ni.

ATC Valedictory Service-ah hian zirlaite leh ATC-a thawkte bakah, Synod hotute leh zirlai chhungte an tel a ni.