Maundy Thursday leh Good Friday hmang

April 1, Ningani zan kha Isua Krista man zan, Venpui Zan/Lungngaih Zan (Maundy Thursday) tia sawi ṭhin a ni a, nimin kha Isua khenbeh ní a ni bawk a; heng hunte hi Mizorama kohhran hrang hrangte'n urhsûn takin an hmang.

Mizoram Presbyterian Kohhrana tualchhung kohhran hrang hrangte chuan Ningani zan khan Lalpa Zanriah Sakramen an kîlho a, thupui chu 'I thu ni se' tih a ni. Nimin Good Friday khan chawhma leh chawhnua an inkhawm bakah, zanah inkhawmte pawh an awm a; thupuite chu chawhmaah 'Baraba nge Isua?' tih niin, chawhnuah 'Mahni a intidam thei lo' tih leh zanah 'Mi sual zingah an chhiar tel' tihte a ni.

Roman Catholic kohhrante chuan Pathianni kal ta, Tumkau Ní aṭang khan hapta thianghlim an hmang ṭan. Ningani zan khan Isua tih dan angin 'Ke sil zan' an hmang a, puithiamte'n kohhran mi thlan chhuahte ke an silsak a; chumi zawhah venpuina hun an hmang zui a ni.

Catholic kohhrante hian Good Friday pawh urhsûn takin an hmang a, Isua'n Kalvari tlang pana kraws a putna hriat reng nan kraws kawngzawh ṭawngṭai hun an hmang. Kraws Kawngzawh hi kum dangah chuan khawlaiah an nei ṭhin a, kuminah erawh chuan hripui lêng avangin biak-inah an nei a; kraws kawngzawh an hman zawh veleh biak-inah an inkhawm nghal bawk.

Kohhran páwl dangte pawhin Maundy Thursday leh Good Friday-te hi urhsûn takin an hmang a, kohhran eng emaw zat chuan sakramen an kîlho a ni.