KHAWTHLIR
Easter Sunday
Naktuk Pathianni Isua Krista thia a thawh lehna ní, Easter Sunday a ni. Easter Sunday pual hian Mizorama kohhran hrang hrangte chuan hun an hmang dawn a; zing kara Easter Sunrise Service hmang tur kohhran eng emaw zat an awm bawk.
Thisen pe
Muthi Branch YMA chuan April 1, Ningani khan anmahni hmunah Aizawl Civil Hospital tan thisen unit 38 an pe a, petute mipa 28 leh hmeichhia 10 a ni.
Minister-in enfiah
Minister of state K Lalrinliana chuan April 1, Ningani khan Mizoram leh Assam inrina Bairabi bula Zophai tlawhin, ramri hrûla kawng laih mek a enfiah. K Lalrinliana chuan, ramri humhalhna atan ramri hrûl tih hmasawn a, ramrîah hmasawnna ruhrel din zel a ṭul thu a sawi a, "Sorkar chuan theihtawp chhuahin hma a la mek a ni," a ti.
MNF VC ding
Neihloh khuaa Congress VC president, treasurer leh secretary-te chuan MNF party an zawm a, hei vang hian Neihloh khuaah hian Congress VC ding tawh loin MNF VC a ding. VC hotute hi MNF adviser Lalchhandama Ralte chuan Ningani khan MNF-ah a lawm lut a ni.
Coaching Centre
Siahaa Mizoram Youth Commission Coaching Centre chu April 1, Ningani khan ṭan a ni a, batch hmasa berah MPSC leh MSSSB course kalpui a ni. Centre tharah hian zirlai 12, faculty member pathum leh coordinator pakhat an awm a, district bawrhsap Kesavan R chu visiting faculty member a ni.
In kâng ral
April 1, Ningani zing khawvar hma khan Pángzawl, Lunglei district-a Chuautawna in, Assam type chu a kang a, bungrua chuh hman lohin a kâng ral; in kan chhan hriat a ni lo. Bialtu MLA Dr Vanlalṭanpuia chuan in kâng neitute chu in chung tur rângva a pek tur thu a sawi bakah, hnatlangte ei leh in senso atan Rs. 3,000 a pe a; bialtu MLA hlui PC Lalthanliana'n in neitute Rs. 3,000 leh YMA hnenah Rs. 2,000 a pe bawk.
Candidate siam lo
Zoram Thar Zofate Lairelna hruaitute chuan Ningani khan Serchhip Press Club-ah thuthar thehdarhtute an kâwm a, Serchhip biala Assembly by-election-ah candidate nei lo turin thutlukna an siam thu an puang. Zoram Thar hian kum 2018-a Assembly inthlanpuiah khan bial eng emaw zatah candidate an lo dah tawh a ni.
Mizo dan thlirho
Mizoram Law Commission chu April 1, Ningani khan an chairman Lala Khawbung hoin a pisaah an ṭhu a, ‘The Mizo Marriage, Divorce & Inheritance of Property Act, 2014’ hnuaia Law Commission, Central YMA leh MHIP-te'n siamṭhat tura rawtna an thlente an thlirho. Rawtna lutte chu ngun taka zir chian a, ṭhutkhawm leh huna ngaihtuah atan an dah. CrPC Section 125, 127 leh 167-na chungchang an sawiho bawk.
Capping and Lamp Lighting
Auxiliary Nursing & Midwifery (ANM) School, Lawngtlai chuan March 31, 2021 khan an auditorium-ah batch lina zirlaite lukhum khumtirna leh khawnvar chhia thutiam lakna hun (Capping and Lamp Lighting Ceremony) an buatsaih a, Lawngtlai additional DC Marilyn Rualzakhumthangi'n a hmanpui.
ANM School, Lawngtlai hi October 2017-ah zirlai 20 nen bul ṭan a ni a, October 2019 aṭangin principal kutah Drawing & Disbursing Officer (DDO) thuneihna pek niin, mahnia inrêlbâwlin an awm ṭan. Tun dinhmunah principal hoin tutor pali, non-teaching staff pariat leh zirlai 39 an awm mek a ni.