Mizoramah thla thum chhungin Covid-19 vei mi 260 hmuh a ni

IDSP-in Covid-19 chungchang a tarlan danin, kumin chhunga hripui vei hmuh chhuah mi 260-te chu January thlaa hmuh chhuah mi 156, February thlaa hmuh mi 51 leh March thlaa hmuh chhuah mi 53 an ni a; January-ah mi 232, February-ah mi 63 leh March-ah mi 43 chhuahtir an ni thung.

Thla thum chhung hian thla tin mi pakhat ṭheuh Covid-19 vei thi an awm a, ṭhenkhat erawh chu an thih hmaa swab test-ah negative tawhte an ni.

Covid-19 positive thla thum chhunga hmuh chhuah 260-te chu ZMC laboratory-a hmuh mi 90, TrueNAT-PCR hmanga hmuh mi 41 leh RAT hmanga hmuh chhuah mi 139 an ni. January thla bika hmuh chhuah mi 156-te chu ZMC-a hmuh mi 77, TrueNAT-PCR hmanga hmuh mi 24 leh RAT hmanga hmuh chhuah mi 55 an ni.

February thlaa hmuh chhuah mi 51-te chu ZMC-a hmuh mi pathum, TrueNAT-PCR-a hmuh mi pali leh RAT hmanga hmuh mi 44 an ni a; March thla chhunga hmuh chhuah mi 53-te chu ZMC-a hmuh mi 10, TrueNAT-PCR hmanga hmuh mi pathum leh RAT hmanga hmuh chhuah mi 40 an ni bawk.

January chhung khan swab sample 26,784 endik a ni a, February thlaah sample 23,281 leh March thla chhungin sample 19,899 endik a ni bawk a; sample endik zat hi a tlem tial tial tih a lang.

Kumin chhunga Covid-19 vei hmuh chhuah tam ber ni chu January 9 a ni a, mi 17 hmuh chhuah a ni. January thlaah hian positive mi 10 aia tam hmuh chhuah ni nga awmin, January 21-a mi 12 hmuh chhuah a nih hnuah mi sawm aia tam hmuh chhuah ní a awm tawh lo a; January 21 hnu lama hmuh chhuah tam ber ni chu April 1 niin, mi pariat hmuh chhuah a ni.

January thlaah Covid-19 positive hmuh chhuah loh ní, ni nga a awm a; hripui vei thi mi pakhat - Lakhi Dhan Chakma (57), Silsury, Mamit district a awm a, January 10-a a thih hmain, January 5-ah a negative tawh tih hmuh a ni thung.

February thla chhungin Covid-19 vei hmuh loh ní ni ruk a awm a, vei hmuh chhuah tam ber ní, February 18 leh 25-ah mi paruk ve ve hmuh chhuah a ni. February thlaah hian Covid-19 vei thi pakhat awmin, T Pazawna (82), Ramhlun North a ni a, February 15-a a thih hmain Covid-19 negative tih hmuh chhuah tawh ve bawk a ni.

Kumin March thla chhungin Covid-19 positive hmuh chhuah loh ní, ni riat a awm a, hmuh chhuah tam ber ní, March 25-ah mi paruk hmuh chhuah a ni thung. March thlaah hian Covid-19 vei thi mi pakhat bawk a awm a, Ratna Gurung (54), Venghlui a ni. Ani hi March 17 chhunah Covid-19 vei a ni tih hmuh chhuah a ni a, March 17 vêk zan dar 11:40-ah a thi a ni.