Covid-19 léng dinhmun thlirho a ni, Fimkhur zual turin mipui an chah

Health minister Dr R Lalthangliana leh Home minister Lalchamliana te hoin April 1, Ningani khan Secretariat conference hall-ah Covid-19 dinhmun thlirho a ni. Covid-19 chi thar darh mek chu Mizoramah kái an la awm lo nia hriat a nih thu an sawi rualin, a hmaa mi aiin kài a awl zawka hriat a nih avangin fimkhur zual a ṭul thu an tarlang.

Ṭhutkhawmah hian Covid-19 hri hluar thar leh chu a hmaa mi aiin 70%-in inkài chhàwn a awl zawka hriat a nih thu te, Mizoramah a luh loh nan ṭan lak a ngaih thu te, Mizoramah kài an awm pawha hmachhawn tura inbuatsaih a ngaih thu te, ṭhalaiin an kái awlsam zawka a lan thu te, inkaihhruaina hman mek chu hun tawn azirin siamṭhat a ngaih theih thute an sawi a ni.

Tun hnaia Mizorama Covid-19 positive hmuh chhuahte sample 200 chu laboratory lian zawkah endik nawn turin phai lamah thawn mek a ni tih sorkar thuchhuah chuan a tarlang.

Meeting-a tarlan danin, Mizoramin Covid-19 vaccine dose 1,28,840 a dawng tawh a; March 31, 2021 thleng khan mi 52,882 hnenah dose khatna pek a ni tawh a, mi 12,018 hnenah dose hnihna pek a ni tawh. April 1 aṭangin India ram pumah kum 45 chin chung lamte tan pek ṭan a ni a, private hospital-in vaccine an pek theih nan ruahmanna siam mek a ni.

Kumin March thla tawp thlenga dinhmun angin, Mizorama Covid-19 vei hmuh tawh mi 4,476 zingah kum 10 hnuai lam 192, kum 11-20 inkar 611, kum 21-30 inkar 1361, kum 31-40 inkar 1,129, kum 41-50 inkar 651, kum 51-60 inkar 390, kum 61-70 inkar 98 leh kum 70 chung lam mi 44 an awm.

Mizoramin PPE thla li daih, N-95 mask thla hnih daih, three layer mask thla li daih, kutkawr kum khat leh a chanve daih, hand sanitizer thla hnih daih, sodium hypochloride thla hnih daih, viral transport medium thla ruk daih leh RAT kit thla li daih a la nei a ni.

Ṭhutkhawmah hian Covid-19 Medical Operational Team chairman Dr ZR Thiamsanga, MLA, chief secretary Lalnun­mawia Chuaungo bakah, Home, Health, DMR leh IPR department hotu te, Aizawl DC, Contact Tracing Team, Indian Medical Association, Mizoram Kohhran Hruaitute Committee (MKHC) leh Joint NGO Coordination Committee aiawhte an tel.