Chite lui thianghlimna tura hmalakna tlawh

Save Chite Lui Committee chuan April 1, Ningani khan Aizawl khawpui bawlhhlawhte Chite luia a luan luh zel lohna tura Theihai lui mawng, Chite kama a dâwlna siam chu an tlawh a, AMC hruaitute'n executive councillor (i/c solid waste management) Laltlanzova Khiangte hoin an ṭawiawm.

Laltlanzova Khiangte chuan, changkang leh hmél mawi takin lang ṭhin mah ila, hmel dik tak pawm ngam a ṭul thu sawiin, "He laia bawlhhlawh tling khawm kan hmuh aṭang ringawt pawh hian bawlhhlawhte hi ina khawn mai a ngai tawh a ni tih a tilang chiang hle. Chumi tihlawhtling tur chuan mipui lam pawh kan ṭan hle a ngai dawn. Aizawl khawpui faina tura theihtawp chhuah turin mipui ka sáwm a ni," a ti.

Aizawl khawpui faina leh thianghlimna turin mimal, páwl, ṭhian ho, kohhran leh local council-te thawhpui turin a inhuam reng tih sawiin Laltlanzova chuan, "Faina kawnga ke pên inhuamte lo chhuak zel turin ka sáwm a ni," a ti a; Aizawl hmél a mawi a, a thianghlim theih nanna finchhuah zel turin mipui a ngen a ni.

Chite kam an tlawhnaah hian AMC councillor pali - Vanlalneiha, John Zosangliana Ralte, Chuauzikpuii leh Christina Roluahpuii Sailo te pawh an tel.