COVID-19: Mizoram dinhmun Ni 2 chhungin hripui vei mi 11
Mizoramah Covid-19 vei March 31, Nilaini khan mi pathum hmuh chhuah a ni a, April 1, Ningani khan mi pariat hmuh belh leh a ni. Ni hnih chhunga hripui vei hmuh thar mi 11 zingah tualchhunga kái leh symptom nei mi pali ve ve an tel.
Covid-19 vei Nilainia hmuh belh mi pathumte chu TrueNAT-PCR hmanga hmuh chhuah mi pakhat leh RAT hmanga hmuh chhuah mi pahnih an ni a; Ningania hmuh thar mi pariatte chu ZMC laboratory-a hmuh chhuah mi pakhat, TrueNAT-PCR hmanga hmuh mi pathum leh RAT hmanga hmuh chhuah mi pali an ni.
Ningani khan hripui laka fihlim tawh mi pahnih - SRH-ZMC leh Durtlang BSUP CCC aṭangin mi pakhat ve ve chhuahtir an ni a, niminah chhuak an awm lo.
Mizoramah Covid-19 vei mi 4,484 hmuh chhuah a ni tawh a, mipa 3,261 leh hmeichhia 1,223 an ni. Nimin tlai dar 5 thleng khan mi 4,436 (98.93%) chhuahtir an ni tawh a, mi 11 (0.25%) thi tawhin, enkawl mek mi 37 (0.82%) an awm.
March 31, Nilaini khan ZMC laboratory-ah swab sample 110, TrueNAT-PCR hmangin district pathumah sample 11 leh RAT hmangin district parukah sample 682 endik a ni a; sample endik zawng zawng chu 803 niin, chu'ng aṭanga Covid-19 positive hmuh chhuah pathum chu 0.37% a ni. ZMC-ah hripui vei hmuh chhuah a ni lo.
Ningani khan ZMC laboratory-ah sample 107, TrueNAT-PCR hmangin Lunglei leh Hnahthialah sample 28 leh RAT hmangin district pasarihah sample 600 endik a ni a; sample endik zawng zawng chu 735 niin, chu'ng aṭanga Covid-19 positive hmuh chhuah pariat chu 1.08% a ni.
April 1, 2021 thlengin Mizoramah swab sample 2,53,938 endik a ni tawh a, chu'ng aṭanga Covid-19 positive hmuh tawh zat 4,484 chu 1.77% a ni. Hripui vei hmuh tawh zinga mi 2,136 chu Mizoram chhunga kái chhâwng an ni a, mi 2,348 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,664 hmuh chhuah a ni tawh a, TrueNAT-PCR hmangin 679 leh RAT hmangin 1,140 hmuh chhuah a ni tawh.
Mizorama district 11 zinga district pariat - Lunglei, Siaha, Kolasib, Serchhip, Lawngtlai, Mamit, Saitual leh Khawzawl district-ahte hripui vei an awm tawh rih lo.
Covid-19 vei hmuh tharte
March 31-a hmuh chhuahte
Hnahthial Electric Veng- 1: TrueNAT-PCR hmanga hmuh mipa kum 3, a chenpui zinga mi March 30-a positive hmuh tawh, symptom nei lo.
Lengpui Airport - 2: Hmeichhia kum 23 & 21, Khawzawl mi Mumbai aṭanga haw, symptom nei leh Serchhip khaw mi Pune aṭanga haw, symptom nei lo.
April 1-a hmuh chhuahte
ZMC-a hmuh chhuah
Upper Republic - 1: Hmeichhia kum 25, March 25-a Kolkata aṭanga haw, symptom nei.
TrueNAT-PCR-a hmuh
Zokhawthar - 2: Hmeichhia kum 65 leh 76, symptom nei ve ve, hri an kaina hriat loh.
Hnahthial Electric Veng - 1: Mipa kum 7, positive contact vanga sample endik, symptom nei lo.
RAT hmanga hmuh
Hunthar Veng - 1: Hmeichhia kum 30, Delhi aṭanga haw, Lengpui Airport-a hmuh chhuah, symptom nei.
Kolasib - 1: Hmeichhia kum 34, Delhi aṭanga haw, Airport-a hmuh chhuah, symptom nei lo.
West Phaileng - 1: Hmeichhia kum 7, Jharkhand aṭanga haw, Airport-a hmuh chhuah, symptom nei lo.
Mamit - 1: Mipa kum 21, Tripura aṭanga rawn lut, Airport screening point-a hmuh chhuah, symptom nei lo.