Inthlan zawh fel a nih hma chuan inthlahdah a thiang lo - Mizoram CEO

Chief electoral officer (CEO) P Jawahar chuan April 1, Ningani khan Serchhip biala MLA by-election neih tur chungchangah Serchhip, Neihloh leh Buangpui khuate a tlawh a; inthlanna kaihhnawih thilte zawh fel vek a nih hma chuan inthlahdah a thiang lo tih a sawi.

P Jawahar hian Serchhip biala rural area polling station awmchhun pahnih, Neihloh leh Buangpui khuaa polling station-te a tlawh a; inthlanna felfai a awm theihna tura inbuatsaih dan a enfiah a, lungawithlak a tih thu a sawi. Chumi hnuah Serchhip DC meeting hall-ah nodal officer-te a kâwm leh a ni.

CEO chuan, Serchhip District Election Officer (DEO) leh a thawhpuite inbuatsaihna chu ṭha tâwka a hriat thu a sawi a, "Hmabak thawh tur awm apiangte pawh felfai taka kalpui zel a nih ka beisei. Inthlan a zawh vek hma chuan tu mah kan inthlahdah a thiang rih lo," a ti.

Inthlanna thianghlim leh felfai nei turin election team hrang hrang leh officer thawktute inpawhna ṭha a ṭul tih sawiin, "Kawng khata thil fel lo a thlen palhin chu chuan thil dang a kâng kái zel thei tih hre chungin, kil hrang hranga hmalaknate inhrepawh tawn chunga hma kan lak zel a pawimawh," a ti a; Election Commission of India inkaihhruainate hre chiang turin officer-te a chah.

DEO Kumar Abhishek chuan, inbuatsaihna chu election puan a nih hma aṭangin a theih ang angin bul an ṭan thu a sawi a; an kalpui tawh chin leh hmabak awmte a sawifiah a ni.