Independence vawi 75-na lawm ṭan

India Independence vawi 75-na lo thleng tur lawmna bul ṭanna, ‘Azadi Ka Amrit Mahotsav’, India@75 chu April 1, Ningani khan Vanapa Hall-ah hawn a ni a, chief minister Zoramthanga khuallian a ni.

CM Zoramthanga chuan, India ramin zalenna a hmuh theih nan thil tam tak a paltlang thu a sawi a, "India hnam pa Mahatma Gandhi a kaihhruaiin non-violence hmangin zalenna an sual a, British ho pawhin do harsa an tih ber a ni," a ti a; tharum thawh loin August 15, 1947-ah India-in British awpna aṭangin zalenna a hmuh thu a sawi.

India ramin democracy a champion pui thu sawiin Zoramthanga chuan, "India chu khawvela hmun sang leh hniam ber, hnam chi hrang hrang inpawlh awmna ram a ni a, nationality mai bakah ethnic group hrang hrang ni mah ila kum 70 chuang independence democracy-a kan awm hi thil mak a ni," a ti a; khawvel democracy ram tam takin an entawn leh a Constitution chu an zir rawn a nih avangin chhuanawm a tih thu a sawi bawk.

Azadi Ka Amrut Mahotsav hi India-in zalenna a hmuh champha kum 75-na chhinchhiahna tura kawng hrang hranga lawmna buatsaih a ni dawn a; chawlhkar 75 chhung, August 15, 2021 thleng a awh dawn a ni.