Pawl 3 leh 4-te sikul kai ṭan

Mizoram sorkar remtih angin pawl 3 leh pawl 4 zirlaite chuan April 1, Ningani aṭang khan sikul an kái ṭan a, Covid-19 laka an him theih nan fimkhur taka kalpui a ni.

Vanglaini thu dawn danin, sikul ṭhenkhat, zirlai tam deuhnaah chuan chawhma leh chawhnuah inkal chhâwk a ni. Sikulte endik tura ruatte'n sikulte'n Covid-19 chungchanga inkaihhruaina an zawm leh zawm loh an enfiah a, an zawm ṭha tlangpuiah an ngai.

Tarlan tawh angin, State Disaster Management Authority hnuaia State Executive Committee remtihnain middle school chin, pawl 5 leh a chung lamte chuan sikul an kái tawh a; primary school zingah, pawl 3 leh pawl 4-te chuan April 1 aṭangin sikul an lut ṭan ve leh a ni.

Covid-19 léng avanga sikul kal mumal theih a nih loh avangin tun academic session-ah hian syllabus 30% paih a ni.