Lungleiah sorkar hmalakna thlirho

Lunglei additional DC R Vanrengpuia leh sorkar official-te chuan April 1, Ningani khan a pisaah thisen thlâkchhamna chungchanga hmalakna (Anemia Mukt Bharat), Intensified Mission Indradhanush (IMI) leh Family Planning QAC chungchanga hmalak dan tur leh hmalak tawhte an thlirho.

Ṭhutkhawmah hian, Lunglei district-a nausen thla 6 leh tleirawl kum 19 inkarte hnena Anemia damdawi sem dan tur leh pek dan tur ruahman a ni a; IMI 3.0 thawh khatna leh thawh hnihna pek dan te, Covid-19 vaccine pek dante ngaihthlak a ni.

Tarlan danin, family planning avanga mipa leh hmeichhia insiam aṭanga ni sarih chhunga an thih chuan Rs. 2,00,000 pek theih an ni a, ni 8-30 chhunga an thih chuan Rs. 50,000 pek theih an ni. Hmeichhia insiam tawhin nau a pài leh chuan Rs. 30,000 pek theih a ni a, ni 60 chhung damdawi-ina inenkawlna senso Rs. 25,000 aia tam lo pek theih a ni bawk.