KHAWTHLIR

Thisen pe
Ramthar Tlangveng Branch KṬP chuan an branch KṬP din champha vawi rukna pualin Inrinni khan an Kohhran Hall-ah blood donation camp an huaihawt a, Synod Hospital tan thisen unit 33 pein, a petute mipa 27 leh hmeichhia paruk an ni. Sangaua Lairam Isua Krista Baptist Kohhran Ṭhalai Pawl pawhin Inrinni khan Siaha District Hospital-ah thisen unit 39 an pe a, a petute hi mipa 37 leh hmeichhe pahnih an ni.

Khawl leina tur sum hlân
Kristian Ṭhalai Pawl (KṬP), Chanmari Branch chuan an kum 60 tlinna, diamond jubilee pualin nimin chawhnu khan Synod Hospital hnenah naupang mit enna, Handheld Auto Refractometer leina tur Rs 3,50,000 an hlan. Khawl leina atan Chanmari Branch KṬP chuan project siamin an tuak a, an tlin hnuah diamond jubilee pualin an Branch leader MS Dawngkima'n Synod Hospital Eye department HoD Dr Lalrindiki hnenah a hlan a ni.

Faina hnatlang
Young Lai Association (YLA) kumpuan, 'Faina leh thianghlimna' bawhzuiin Inrinni khan YLA branch hrang hrangte'n an huam chhung ṭheuhah faina hnatlang an nei. Hnatlangah hian khaw chhung hmun pawimawh te, tuihâwk luankawr te, lungrem leh kawngko hnimte an thianfai a, lungrem rawng an hnawihṭha bawk. YLA hruaitute chuan mi tinte chu mahni thli leh bawlhhlawhte senghawi ṭha turin an ngen a ni.

Sabawn tlangzarh
Lushai Soap Industry neitu H Laldinmawia, Lunglei Zohnuai-in thleng silna sabawn a siam thar chu April 12, 2019 khan Lunglei district MJA president H Lalthansanga'n Art & Culture auditorium-ah a tlangzarh. H Lalthansanga chuan, Lunglei tlangvalin a kutkawih ngei hmanga inbualna sabawn a siam tawh hnuah, thlêng silna a siam chhuak leh chu lawmawm a tih thu a sawi a, "Mizo siam ngei thil hi kan ngaihhlut a, Mizote ngeiin kan hman uar a ṭul," a ti.ṭ

Lok Adalat
Kolasib District Lok Adalat chu Inrinni khan Kolasib District Court-ah Kolasib District Legal Service Authority secretary Sylvie Zomuanpuii, chief judicial magistrate hoin an ṭhu a, thubuai 35 an ngaihtuah zinga panga chingfelin an titawp a ni.